Bandaríski leikarinn og leikstjórinn Bradley Cooper hefur verið gagnrýndur fyrir að setja upp gervinef í hlutverki Leonard Bernstein í mynd um ævi hans, sem ber titilinn Maestro. Þykir það móðgandi fyrir gyðinga en Bernstein var sonur úkraínskra gyðinga sem voru innflytjendur í Bandaríkjunum, segir í frétt The Guardian. Cooper leikstýrir auk þess myndinni og er einn af handritshöfundunum.
Bernstein er þekktastur fyrir tónlistina í söngleiknum West Side Story en hann samdi líka þrjár sinfóníur og var tónlistarstjóri Fílharmóníunnar í New York.
Breska leikkonan og aðgerðasinninn Tracy-Ann Obermann gagnrýndi Cooper á samfélagsmiðlum og sagði þetta jafnast á við svokallað „black-face“, þar sem andlit hvítra er litað svart.
Börn Bernsteins hafa hins vegar staðið með Cooper og skrifað á samfélagsmiðla að þeim þyki miður að horfa upp á að gjörðir Coopers séu misskildar á þennan hátt. Þeim þyki ekkert athugavert við að hann noti farða til þess að ýta undir líkindin með föður þeirra.