Norður
♠ D
♥ 10953
♦ G8
♣ KDG1052
Vestur
♠ Á1043
♥ DG6
♦ K76
♣ Á98
Austur
♠ 98732
♥ 872
♦ 942
♣ 53
Suður
♠ KG6
♥ ÁK4
♦ ÁD1053
♣ 73
Suður spilar 3G dobluð.
Um miðja nítjándu öld bauð jarlinn af Yarborough spilafélögum sínum í vist upp á sérstakt veðmál. Fyrir aðeins eitt pund mótaðilans var hann tilbúinn til að reiða fram þúsund pund ef viðkomandi fengi hönd þar sem ekkert spil væri hærra en nía. Líkur á Yarborough – en svo heitir slík hundahönd – eru 1 á móti 1828, svo það má reikna með að jarlinn hafi hagnast vel á viðskiptunum.
Króatinn Ivan Bilusic tók upp Yarborough í leik við Singapúr á HM ungmenna. Hann átti ekki kost á að veðja við jarlinn en var til í annars konar og verra veðmál – eftir pass norðurs í byrjun opnaði hann galvaskur á 2♠ með níuna fimmtu! Og það á hættunni. Suður kom inn á 2G og varð síðan sagnhafi í 3G, sem vestur leyfði sér að dobla. Óhaggandi spil: Eftir spaða út sótti sagnhafi einn slag á lauf og fór svo í tígulinn.