Kringlukastarinn Guðni Valur Guðnason hafnaði í 22. sæti á heimsmeistaramótinu í frjálsum íþróttum sem nú stendur yfir í Búdapest í Ungverjalandi.
Guðni kastaði 59,97 metra í fyrstu tilraun undanrásanna en hans annað kast var ógilt. Í þriðju tilraun kastaði hann 62,28 metra sem er jafnframt lengsta kast hans á stórmóti á ferlinum en hann hefði þurft að kasta lengra en 63,79 metra til þess að tryggja sér sæti í úrslitunum.
Hann varð ellefti í sínum riðli í undanrásunum og hafnaði að endingu í 22. sæti.
Sleggjukastarinn Hilmar Örn Jónsson náði sér ekki á strik í sinni grein en öll þrjú köst hans í undanrásunum voru ógild. Fyrstu tvö köstin enduðu í netinu og það þriðja og síðasta fór út fyrir geira.
Hilmar hefði þurft að kasta nálægt eigin Íslandsmeti í greininni, 77,10 metra til þess að vera öruggur inn í úrslitin.
Þeir Guðni Valur og Hilmar Örn hafa því lokið keppni á HM í ár en kúluvarparinn Erna Sóley Gunnarsdóttir, sem er að taka þátt á sínu fyrsta heimsmeistaramóti, keppir í undanrásum laugardaginn 26. ágúst.
Heimsmeistaramótinu lýkur á sunnudaginn kemur, hinn 27, ágúst, og voru þau Guðni Valur, Hilmar Örn og Erna Sóley einu keppendur Íslands á mótinu.