Besta deildin
Bjarni Helgason
bjarnih@mbl.is
Víkingur úr Reykjavík steig stórt skref í átt að Íslandsmeistaratitlinum þegar liðið vann stórsigur á Val í Bestu deild karla í knattspyrnu, 4:0, á Hlíðarenda í 20. umferð deildarinnar í gær.
Víkingar eru með 53 stig, sem er stigamet í tólf liða deild hér á landi, og hafa nú 11 stiga forskot á Valsmenn sem eru í öðru sætinu, þegar tveimur umferðum er ólokið af deildarkeppninni.
Breiðablik styrkti stöðu sína í þriðja sætinu með 2:1-sigri gegn Keflavík á Kópavogsvelli.
FH bjargaði sér fyrir horn með jöfnunarmarki í uppbótartíma gegn HK í Kórnum þar sem lokatölur urðu 2:2.
Fylkir vann lífsnauðsynlegan sigur í fallbaráttunni gegn ÍBV á Hásteinsvelli, 1:0, þar sem sigurmarkið kom á lokamínútunum.
Þá lyftu Framarar sér upp úr fallsæti með afar mikilvægum 2:1-sigri gegn KA á Framvelli í Úlfarsárdal.