Jón Gissurarson skrifar á Boðnarmjöð á miðvikudag: Þrátt fyrir smávægilega skúri framan af degi hefur veðrið verið gott í allan dag. Þegar þetta er ritað klukkan að verða 10 að kveldi er hitastigið úti 12 gráður, fór mest í 15 gráður í dag. Vindur andar af vestri 3 m á sek. fór mest í 13 metra á sek. í dag. Loftvog stendur í 1015,5 hpa. Úrkoma hefur verið svo lítil að hún hefur ekki mælst. En útsýnið er fallegt.
Útsýnið hér ekki dvín
allt í kringum bæinn
yljar mér sem eðalvín
allan heila daginn.
Jón Atli Játvarðarson bætti við:
Vindur andar vestri af,
vatni landa skúrir nett.
Gulan sand við glóir haf,
glitrar bandið perlum sett.
Og Ágúst H. Bjarnason:
Ekki bauðstu upp á vín
allar vorar stundir;
aðeins fagra yfirsýn
út um koppagrundir.
Gaman var og gott að sjá
grænar spildur jarðar.
Verður ertu vísu’ að fá,
vörður Skagafjarðar.
Reinhold Richter yrkir:
Stundum þegar það sem má
þvælist fyrir röngu;
óvart verður okkur þá
á á lífsins göngu.
Indriði á Skjaldfönn sagðist ekki muna eftir að hafa áður séð tvö „á á saman“. Því svaraði Bergur Torfason svo: Hugdetta:
Jón á Á, á á sem varð
það á á lífsins göngu
að fara á ána ofan við Skarð
á ærgötunni þröngu.
Magnús Halldórsson yrkir:
Alla jafnan ósköp hreint
yrðu til af gulli
væri hægt að vinna beint,
úr vitleysu og bulli.
“Enn öskrar djúpt í rótum lands” segir í Morgunblaðinu. “Landris við Torfajökul og Öskju.” Kristján H. Theodórsson yrkir:
Höfuðskepnur herja á oss,
hermir maður vökull.
Ef vendir sínu kvæði í kross,
kaldur Torfajökull.
Kristján Karlsson orti:
“Ég man ekki meira í flýti,”
sagði maður sem flaut á spýtu.
Hann drukknaði óðara
en hann drukknaði fróðari
um dauða og minni og spýtu.
Biskup þarf að borga vask,
Baskaþjóðin veiðir fisk,
Höskuld mærði herra Rask,
haska ég mér nú í Jysk.
Ekki er það gott, – Þorgeir Magnússon yrkir:
Bitur, lúinn, bláedrú,
berst ég nú við grát og trega.
Sopinn búinn, segir þú,
sem ég trúi mátulega.
Jakob Guðmundsson orti:
Taumar leika mér í mund,
minn þá Bleikur rennur.
Þetta veika léttir lund
lífs meðan kveikur brennur.
Bjarni frá Gröf kvað:
Sumir horfa alltaf á
annarra manna bresti.
En vilja ekki sjálfir sjá
sína eigin lesti.
Halldór Blöndal