Guðbjörg Sveinsdóttir geðhjúkrunarfræðingur hefur verið sæmd heiðursorðunni sem kennd er við Florence Nightingale, en það er æðsti heiður sem hjúkrunarfræðingi getur hlotnast á alþjóðlega vísu. Íslenskum hjúkrunarfræðingi hefur ekki hlotnast þessi heiður frá árinu 1989.
Í tilkynningu frá Rauða krossinum kemur fram að Guðbjörg hafi á ferli sínum verið ötull málsvari fólks með geðraskanir og unnið að bættri geðheilbrigðisþjónustu. Hún hafi einnig leitt stofnun úrræða sem bæta þjónustu fyrir fólk með geðraskanir bæði hér á landi og erlendis. Hún fór fyrir dagsetrinu Vin fyrir fólk með geðraskanir sem Rauði krossinn á höfuðborgarsvæðinu rak í nær 30 ár og leiddi árangur þess.