Ingólfi Ómari Ármannssyni datt í hug að gauka eins og þrem vísum að mér: Það er farið að skyggja og haustið er á næsta leiti.
Sveipast bráin himinhá
húmsins bláu tjöldum.
Merlar gljái mánans á
myrkum sjávaröldum.
Ég skrapp á fjöll í sumar og þá urðu þessar til:
Frjáls á leið um fjallasvið
fláa og eyðisanda.
Förin greiðist fram á við
fram til heiðalanda.
Hamra seiða beltin breið
björg og eyðiklungur.
Víðsýn leiðin liggur greið
lífs um heiðabungur.
Magnús Halldórsson um stjórnarheimilið:
Hjá stjórnarliði stendur val
um stríð sem flestir skilja.
Því Svandís hefur súrsað Hval,
sem að fáir vilja.
Jón Arnljótsson yrkir á Boðnarmiði:
Þó að vakni sumir seint,
sér til verka bruna.
Utandyra allt er hreint
eftir rigninguna.
Svefnljóð eftir Guðmund Arnfinnsson:
Nóttin er hljóð og hlý,
hyldjúpan í
brátt hennar faðm ég flý,
fagna má því.
Svefninn mér sætur þá
sígur á brár.
Gleymskunnar guði hjá
gróa mín sár.
Guðmundur Stefánsson setur á Boðnarmjöð gamla stærðfræðiþraut í bundnu máli: Dálítið snúið að stemma saman útkomuna. Veit ekki um höfund:
Alin kosta endur tvær,
álftin jöfn við fjórar þær.
Tittlinganna tíu nær
tók ég fyrir alin í gær
Af fuglakyni þessu þá
þrjátíu álnir telja má.
Þá vil ég ekki fleiri fá
en fuglar og álnir standist á.
Guðmundur gefur þessa leiðbeiningu: Takið álftir og tittlinga nokkurn veginn til helminga og bætið einni önd við í lokin.
Davíð Hjálmar Haraldsson útskýrir:
Þetta skáld er vant að gera gátur
og greinilega kann að taka slátur
með álftir 6 og endur 9 í knippi
og óhræddur að skera af 15 typpi.
Sauður byggir víga vá,
varla þiggur friðinn.
Blauður liggur seggur sá,
síður hyggur griðin.
Í betri heimi læsum við sléttuböndin afturábak.
Griðin hyggur, síður sá
seggur liggur blauður.
Friðinn þiggur, varla vá
víga byggir sauður.
Vísur eftir Pál Jónasson á Hlíð:
Kosningavor
Glæstir nú þeysa frambjóðenda flokkar,
fundað er stíft um dreifðar byggðir landsins,
þeir láta svo blítt og hrista hendur okkar
þau hugsjónatröll og vinir litla mannsins.
x
Nú er úti ágústsól
eins og væru galin
hlaupa út um engi og hól
ærnar kýr og smalinn.
x
Eg hef skipt um innri mann í einum penna,
andagift þó enga fann
er ég fór að nota hann.
x
Nú er úti bjart og blítt
brautir orðnar greiðar,
veiði gefur vatnið þítt
vor um allar heiðar.
Halldór Blöndal