Norður
♠ G2
♥ 10864
♦ ÁK742
♣ K8
Vestur
♠ K85
♥ D52
♦ G10965
♣ 32
Austur
♠ D1097
♥ G7
♦ D83
♣ D764
Suður
♠ Á643
♥ ÁK93
♦ –
♣ ÁG1095
Suður spilar 6♥.
„Hann er þá mennskur, eftir allt saman.“ Það var engu líkara en að Magnús mörgæs væri glaður að horfa upp á Michal Klukowski misstíga sig í vörninni. Og það í slemmu. „Ég hef aldrei séð þennan mann taka vitlaust spil áður og svo kemur þessi líka svakalegi fingurbrjótur.“
Slysið átti sér stað í undanúrslitum HM, leik Sviss og Bandaríkjanna. Joe Grue spilaði 6♥ eftir lokaðar sagnir og Klukowski í vestur kom út með tígulgosa. Grue henti spaða í tígulás og tók tvo efstu í trompi. Spilaði síðan laufi á kóng, laufi á ás og gosanum að heiman. Stund sannleikans.
Slemman lekur einn niður ef vestur hendir einfaldlega í slaginn, en einhverra hluta vegna ákvað Klukowski að trompa laufgosann með frítrompinu. Grue gat þá losað sig við spaða úr borði og lagt upp restina.