Sigurður Bogi Sævarsson
sbs@mbl.is
Slæmt veðurútlit réð því að bændur í Hrunamannahreppi flýttu afréttarferð sinni um sólarhring frá því sem ætlað var. Velflestir halda raunar sínu striki og fara á fjall síðdegis í dag, alls um 30 manns, en sjö menn fóru af stað í gærmorgun inn í Kerlingarfjöll og voru þar í fjárleit.
Umhverfis fjallaklasann
„Við höfum í dag farið hér umhverfis fjallaklasann, meðal annars í Kisubotna og Klakk, og höfum fundið rúmlega tuttugu kindur sem nú eru komnar á kerru. Þá vitum við líka af einhverjum kindum í Hveradölum og þeim þurfum við líka að ná,“ sagði Jón Bjarnason fjallkóngur. Sem fjallkóngur hefur hann með höndum forystuhlutverk í óbyggðum, rétt eins og hann er oddviti sveitarstjórnar Hrunamannahrepps.
„Núna erum við hér á tveimur bílum og fimm fjórhjólum. Smalamennskan í dag hefur gengið ágætlega en núna er aðeins farið að hvessa hér. Veðurspáin er ekki beint spennandi og því munum við halda okkur að mestu til hlés á morgun, laugardag,“ sagði Jón Bjarnason um stöðu mála þegar Morgunblaðið hafði af honum tal síðdegis í gær.
Réttir á föstudag
Þau úr Hrumannahreppi sem fara á fjall í dag aka frá Flúðum inn Tungufellsdal í Leppistungur og gista þar í nótt. Þaðan verður riðið um fjöll og firnindi í fjárleit. Fé verður svo rekið fram sveitina nk. fimmtudag og Hrunaréttir eru á föstudag. Óhætt er að segja að réttadagurinn sé ein helsta hátíðin í sveitum lands, í Hrunamannahreppi sem annars staðar. – Í sumar hafa alls um 3.500 fjár verið á víðfeðmum afrétti Hrunamanna. Sá nær frá byggð allt inn að Hofsjökli, en í vestri markast hann af Hvítá og Stóru-Laxá í austri.