Huga verður sérstaklega að verndun og varðveislu skógarreita, trjálunda og grænna svæða innan byggðar og til þess eru sveitarfélög hvött. Þetta segir í ályktun aðalfundar Skógræktarfélags Íslands sem haldinn var á Patreksfirði um helgina. Þar segir að vanmetið sé hvað græn svæði hafa mikla þýðingu fyrir lífsgæði allra landsmanna. Þau bæti skjól í og við þéttbýli, hvetji til útivistar og fjölskyldusamveru og stuðli að bættri geðheilsu.
Jafnframt séu mikil verðmæti fólgin í grænum svæðum, bæði í trjánum sjálfum sem og þeim áhrifum sem þau hafa á nærsamfélagið. Bæði sveitarfélög og íbúar njóta góðs af því. Þá sé kolefnisbinding trjágróðurs mikilvægt loftslagsmál.
„Verndun grænna reita er sjónarmið sem við vildum minna á. Víða um land er nú gengið á skógarreiti sem hefur tekið áratugi að rækta. Þetta er í Reykjavík, Garðabæ, Akureyri og jafnvel víðar. Skógarlundir hafa mikilvægt hlutverk, nú þegar byggt er þéttar og margir eru í fjölbýlishúsum. Einmitt þá skipta græn útivistarsvæði samfélagið meira máli,“ segir Jónatan Garðarsson, sem á fundinum vestra var endurkjörinn formaður SÍ.
Í ályktun er innviðaráðherra svo hvattur til breyta skipulagslögum svo ljóst sé hvort og hvenær skógrækt sé háð framkvæmdaleyfi sveitarfélags. Ferlið megi ekki vera íþyngjandi úr hófi. sbs@mbl.is