Hvalbátarnir Hvalur 8 og Hvalur 9 héldu til leitar síðdegis í gær á miðunum suður, suðvestur og vestur af landinu. Ráðast mun af veðri hvernig til mun takast með veiðarnar, en ekki er unnt að stunda hvalveiðar nema í sæmilega lygnum sjó sem og að dagsbirtu njóti við.
Ætla má að sjólag á miðunum sé að verða hagfellt fyrir veiðarnar, enda færu bátarnir vart á miðin að öðrum kosti.
Hvalbátarnir héldu úr Reykjavíkurhöfn síðdegis á þriðjudag og var ferðinni heitið upp í Hvalfjörð. Að sögn Kristjáns Loftssonar, framkvæmdastjóra Hvals hf., var ætlunin að bátarnir tækju þar veiðarfæri og ýmsan þann búnað um borð sem nauðsynlegur væri til veiðanna.
Sem kunnugt er komust bátarnir frá bryggju eftir að tveir mótmælendur, konurnar Anahita Babaei og Elissa Biou, komu sér fyrir í tunnum í möstrum Hvals 8 og Hvals 9 og dvöldu þar í rúman sólarhring. Vildu þær með þeim hætti mótmæla hvalveiðum Íslendinga. Hefur Hvalur lagt fram kæru á hendur konunum fyrir húsbrot.