Ritskoðaðar raddir í Reykjavík

Landsmönnun gefst í næsta mánuði kostur á að heyra raddir fjögurra erlendra sérfræðinga sem eiga það sameiginlegt að hafa verið ritskoðaðir á tímum covid í nafni „öruggra upplýsinga“, og eru það enn.

Fyrst má þar nefna svissneska lögmanninn Phillip Kruse.

Kruse sérhæfir sig í skatta- og stjórnskipunarrétti, en frá árinu 2020 hefur hann höfðað alls 22 mál tengd covid-19-þvingunum stjórnvalda, þar sem reynt hefur á sönnunarbyrði og stjórnarskrárvarinn rétt. Í einu málanna úrskurðaði Hæstiréttur Sviss að jákvæð niðurstaða PCR-prófs gæti ekki þjónað sem sönnun um sjúkdóm. Kruse er einnig lögmaður hóps svissneskra flugmanna gegn bóluefnaskyldu vinnuveitanda þeirra og er leiðandi rödd borgaralegra réttinda. Hann er meðstofnandi og annar formanna svissneska lögmannafélagsins sem veitir svissneska þinginu og stjórnvöldum lagalegar greiningar er tengjast viðvarandi brotum þeirra á stjórnarskránni. Í nóvember 2022 birti teymi Kruse eina umfangsmestu ákæru sem lögð hefur verið fram gegn svissneskum stofnunum; Svissnesku lyfjastofnuninni o.fl. fyrir að heimila á ólögmætan hátt mRNA-byggð covid-19-„bóluefni“.

Kruse mun m.a. fjalla um hættuna sem aðildarríkjum Alþjóðaheilbrigðismálastofnunarinnar (WHO) stafar af breyttum faraldurssáttmála (e. pandemic treaty) þar sem ríkin munu samkvæmt breytingunum í raun framselja vald sitt í heilbrigðismálum til WHO. Verði nýi sáttmálinn samþykktur þýðir það m.a. að ráðleggingar þessarar alþjóðastofnunar verði ekki lengur aðeins ráðgefandi, heldur bindandi. Um þetta mikilvæga mál hefur nánast engin umræða átt sér stað hér á landi og því kjörið fyrir áhugasama að hlusta á erindi Kruse.

Dr. Vibeke Manniche (MD, PhD), einn af þekktustu læknum Danmerkur og höfundur 35 bóka, aðallega um börn, er einn af fyrirlesurum á málþinginu Sem læknir í 34 ár hefur faraldsfræði verið ofarlega á baugi hjá henni, bæði varðandi sjaldgæfa sjúkdóma og lýðheilsu. Hvað varðar kórónuveirufaraldurinn var hún eini danski læknirinn sem í upphafi talaði opinberlega gegn lokunum og skort á meðalhófi. Tölfræðin og vísindin studdu ekki lokanir, en hræðsluáróður gerði það. Manniche er einn af höfundum vísindagreinarinnar „Batch-dependent safety of the BNT162b2 mRNA COVID-19 vaccine“ sem kom út í vor og hefur vakið mikla athygli. Rannsóknin sýndi í stuttu máli að um 5% framleiðslulota covid-sprautuefnanna væru á bak við meirihluta tilkynntra alvarlegra aukaverkana og dauðsföll í kjölfar sprautana. Í þessu sambandi má geta þess að samkvæmt svörum Lyfjastofnunar Íslands hafa tengsl milli tilkynntra aukaverkana og lotunúmera ekki verið skoðuð sérstaklega. Til að mynda kom í fréttum RÚV 15. ágúst 2021 að 19 ára gömul stúlka hefði lamast neðan mittis daginn eftir að hafa fengið svokallaða örvunarsprautu frá Moderna. Var framleiðslulotan skoðuð eða tekin úr umferð? Nei, ekki samkvæmt svörum Lyfjastofnunarinnar, hvers starfsmenn sögðu að fæstir létu lotunúmerin fylgja með þegar aukaverkun væri tilkynnt til stofnunarinnar. Þetta hlýtur að þarfnast skoðunar. Tegund og lotunúmer eru skráð á rafræn skírteini allra þeirra sem fengu covid-sprautur, og hafa heilbrigðisyfirvöld því upplýsingar um öll lotunúmer og hver fékk hvað. Hvers vegna var ekki brugðist við? Lyfjastofnun heyrir undir heilbrigðisráðuneytið og gegnir því lagalega hlutverki að tryggja öryggi landsmanna í lyfjamálum.

Alexandra Latypova (Sasha) er fædd og uppalin í Úkraínu en fluttist til Bandaríkjanna á fullorðinsárum. Hún er fyrrverandi stjórnandi rannsókna- og þróunarfyrirtækja í lyfjaiðnaðinum. Sasha hefur átt og stjórnað nokkrum rannsóknafyrirtækjum og hefur framkvæmt klínískar rannsóknir fyrir um 60 lyfjafyrirtæki um allan heim. Hún varð áhyggjufull vegna óreglunnar, yfirhylmingarinnar og augljósra svika í tengslum við afar háan fjölda dauðsfalla og örkumlunar sem í ljós kom skömmu eftir að covid-sprautuherferðin hófst. Síðan þá hefur hún rannsakað málin ofan í kjölinn og verið virk í að koma sínum niðurstöðum á framfæri. Sasha hefur skorað á ríkisstjórn Íslands, forstjóra Lyfjastofnunarinnar, landlækni, sóttvarnalækni og aðra aðila innan heilbrigðiskerfisins að mæta á fundinn.

Katherine Watt er frá Bandaríkjunum og er löglærður rannsóknarblaðamaður. Hún hefur starfað við lögfræðirannsóknir og skrif fyrir lögfræðistofur á sviði stjórnskipunar, borgararéttinda og umhverfisréttar. Síðustu ár hefur hún skrifað talsvert um spillingu fyrirtækja og stjórnvalda og ekki síst um málefni matvæla-, vatns- og orkuöryggis. Frá árinu 2020 hefur hún rannsakað breytingar á bandarískum lögum sem koma í veg fyrir saksókn vegna lífeðlisfræðilegra glæpa á tímum Covid.

Málþingið með þessum fjórum erlendu gestum hefst kl. 18.30 á Grand hóteli 4. október nk. og má finna viðburðinn á Facebook undir nafninu: Málþing 4. október. Skipuleggjendur eru samtökin Frelsi og ábyrgð.