Jim Morrison 80 ára nefnist afmælissýning með lifandi undirleik og sögustund um líf og örlög forsprakka hljómsveitarinnar The Doors sem sýnd verður í Háskólabíói á laugardag kl. 20. „Söngvari ársins á Grímu-verðlaununum, Björgvin Franz, lifnar við í hlutverki Morrisons ásamt hljómsveitinni The Doors tribute band sem leikur undir öll helstu lög sveitarinnar. Sérstakur sögumaður er Vera Illugadóttir sem mun varpa ljósi á sögu Morrisons og hljómsveitarinnar,“ segir í viðburðarkynningu. Hljómsveitina skipa þeir Daði Birgisson á hljómborð, Börkur Hrafn Birgisson á gítar, Kristinn Snær Agnarsson á trommur, Birgir Kárason á bassa, Albert Sölvi Óskarsson á barítón saxófón, Sólveig Morávek á tenór saxófón og Tumi Torfason á trompet. Leikstjóri sýningarinnar er Greta Salóme. Miðar fást á midix.is.