Reykjavíkurborg lauk í gær fjármögnun upp á rúmlega fjóra milljarða með útboði á tveimur skuldabréfaflokkum, RVK 32 og RVKN 35. Sá fyrrnefndi er verðtryggður og sá síðarnefndi óverðtryggður. Útboðinu hafði verið seinkað um tvær vikur frá upphaflegri áætlun.
Í heildina bárust tilboð að nafnvirði 4.300 milljónir króna í flokkana. Heildartilboð í RVK 32 voru samtals 2.100 milljónir króna að nafnvirði á bilinu 4,59%-4,75%. Heildartilboð í RVKN 35 voru samtals 2.200 milljónir króna að nafnvirði á ávöxtunarkröfunni 9,64%-9,80%.
Athygli vekur að sömu óverðtryggðu bréf, RVKN 35, voru einnig boðin út í síðasta útboði borgarinnar sem fram fór um miðjan ágúst. Þar ákvað borgin að hafna öllum þeim tilboðum sem bárust þrátt fyrir rúmlega eins prósents lægri kröfu.
Heildartilboð í útboðinu í ágúst námu þá samtals 1.050 milljónum króna að nafnvirði á rúmlega 8,5% ávöxtunarkröfu en í útboðinu í gær var hins vegar ákveðið að taka tilboðum að nafnvirði 2.040 m.kr. á ávöxtunarkröfunni 9,78%.