Tómas Arnar Þorláksson
tomasarnar@mbl.is
„Þetta verður svolítið snúið í vetur. Ég veit ekki alveg hvað þeir eru að hugsa, það verður enginn á reiðhjóli í brjáluðu veðri á Íslandi um veturna,“ segir Kristján Aðalbjörn Jónasson, kaupmaður í versluninni Kjötborg við Ásvallagötu í Vesturbæ Reykjavíkur.
Í gær tóku gildi nýjar reglur um gjaldskyldu í bílastæði í Reykjavík. Rukkað er fram á kvöld og um helgar en fyrir skemmstu var tekin upp gjaldskylda í nágrenni við Kjötborg. Kristján segir gjaldskylduna hafa töluverð áhrif á rekstur verslunarinnar en hann og Gunnar Halldór bróðir hans nota bíl til að flytja aðföng til og frá versluninni. Segjast þeir bræður ekki geta mætt til vinnu eða notað bifreið sem er þeim nauðsynleg til að viðhalda rekstrinum án þess að greiða í bílastæðamæli eða eiga á hættu að fá sekt.
„Ég kem þarna á morgnana og borga 400 krónur til að byrja með. Sektin er 4.500 krónur. Ég er búinn að borga tvisvar sektir síðan þetta byrjaði. Þetta dregur svolítið úr viljanum til að vera með einhverja þjónustu fyrir viðskiptavini, ég veit ekki hvað þeir gerðu ef búðin myndi hætta.“
Hann segir að þetta gæti leitt til þess að þeir stytti opnunartíma verslunarinnar og að jafnvel komi til greina að loka búðinni á sunnudögum vegna gjaldskyldu. Hann segir ýmsa íbúa í hverfinu sýna þeim stuðning.
Kristján segir það enn fremur sorglegt að þessi gjaldskylda verði mögulega til með að fólk komi sjaldnar í heimsókn á elliheimilið Grund sem er rétt hjá Kjötborg.