Mengun hefur greinst í báðum vatnsbólum vatnsveitu Borgarfjarðar eystra. Í tilkynningu HEF veitna segir að ýmsar ráðstafanir hafi verið gerðar til að koma í veg fyrir mengun, og munu aðgerðir halda áfram. Eru íbúar þó beðnir að halda áfram að sjóða neysluvatn.
Á mánudaginn greindi mbl.is frá því að mengun hefði greinst í drykkjarvatni á Borgarfirði eystra við reglubundið eftirlit. Um er að ræða E. coli/kólígerla, sem gefur til kynna að vatnið sé mengað af saur frá mönnum eða blóðheitum dýrum.
Í vikunni sagði Aðalsteinn Þórhallsson, framkvæmdastjóri HEF veitna, að hann vissi ekki til þess að örverumengun hefði komið upp í vatnsveitunni áður.
Næsta sýnataka er áætluð á mánudag og búist við að niðurstöður berist um miðja næstu viku.