Þórir Guðmundur Þorbjarnarson átti sannkallaðan stórleik fyrir Íslandsmeistara Tindastóls í lokaleik 2. umferðar úrvalsdeildar karla í körfuknattleik í Síkinu á Sauðárkróki á laugardaginn.
Leiknum lauk með öruggum sigri Tindastóls, 105:88, en Þórir skoraði 28 stig, tók 12 fráköst og gaf 11 stoðsendingar.
Leikurinn var jafn og spennandi og Tindastóll leiddi með sjö stigum í hálfleik, 47:40. Tindastóll leiddi 75:69 að þriðja leikhluta loknum en Sauðkrækingar skoruðu 30 stig í fjórða leikhluta gegn 19 stigum Keflavíkur og gerðu þar með út um leikinn.
Callum Lawson skoraði 22 stig fyrir Tindastól, tók 9 fráköst og gaf fimm stoðsendingar en Jaka Brodnik var stigahæstur hjá Keflavík með 20 stig og 5 fráköst.
Tindastóll er með fullt hús stiga eða fjögur stig eftir fyrstu tvær umferðirnar í þriðja sætinu en Keflavík er með 2 stig í sjöunda sætinu.