Í tilefni þess að laugardaginn 21. október verða 35 ár liðin frá því að Listasafn Sigurjóns Ólafssonar var opnað í endurbyggðri vinnustofu og heimili listamannsins er boðið upp á tvenna tónleika um helgina og opið hús bæði laugardag og sunnudag.
Fyrri tónleikarnir eru laugardaginn 21. október kl. 20. Þá flytja Hlíf Sigurjónsdóttir, fiðluleikari og dóttir listamannsins, og kanadíski píanóleikarinn Carl Philippe Gionet Fiðlusónötu í B-dúr eftir W.A. Mozart og þriðju Fiðlusónötu Edvards Grieg. Einnig leika þau hina glettnu Scherzo-Tarantella eftir Wieniawski.
Seinni tónleikarnir eru þriðjudaginn 24. október kl. 20. Þá leikur Carl Philippe Gionet einleiksverk fyrir píanó; Franska svítu nr. 2 eftir J.S. Bach, Towers eftir Shelly Washington, Remembering Schubert eftir Ann Southam og sjö smáverk eftir sjálfan sig. Þess má geta að Gionet heldur síðar á árinu málverkasýningu í Listasafni Sigurjóns.
Um helgina verður hins vegar í efri sal safnsins hægt að sjá sýningu Þuríðar Sigurðardóttur, myndlistar- og söngkonu, á málverkum hennar sem tengjast æskustöðvum hennar, Laugarnesi, og öðrum stöðum sem henni eru kærir. Í stóra sal safnsins er sýning á verkum Sigurjóns sem nefnist Úr ýmsum áttum.
Allt frá vígslu safnsins fyrir 35 árum hefur, auk sýninga á verkum Sigurjóns og annarra listamanna, tónlist skipað veigamikinn sess í starfi safnsins og á vegum safnsins verið haldnir tæplega 400 tónleikar.