Áberandi Ástæða þess hve malarhaugarnir við Árskóga hafa verið þar lengi er hægagangur í stjórnsýslunni og regluverk sem þarf að uppfæra.
Áberandi Ástæða þess hve malarhaugarnir við Árskóga hafa verið þar lengi er hægagangur í stjórnsýslunni og regluverk sem þarf að uppfæra. — Morgunblaðið/Árni Sæberg
Bjartmar Steinn Guðjónsson
[ Smellið til að sjá stærri mynd ]
Morgunblaðið greindi frá því í fyrradag að háir malarhaugar gerðu íbúum við Árskóga lífið leitt. Í kjölfar fréttarinnar hafði Bjartmar Steinn Guðjónsson, viðskiptastjóri á mannvirkjasviði Samtaka iðnaðarins, samband við Morgunblaðið og í máli sínu…

Morgunblaðið greindi frá því í fyrradag að háir malarhaugar gerðu íbúum við Árskóga lífið leitt. Í kjölfar fréttarinnar hafði Bjartmar Steinn Guðjónsson, viðskiptastjóri á mannvirkjasviði Samtaka iðnaðarins, samband við Morgunblaðið og í máli sínu lagði hann áherslu á að koma þyrfti fyrir almennilegri losunaraðstöðu innan Reykjavíkur.

„Áhrifin af þessum skorti á losunarstöðvum á höfuðborgarsvæðinu eru veruleg, ef við horfum til dæmis til umhverfissjónarmiða,“ segir Bjartmar. Eins og staðan er í dag þurfa verktakar að losa sig við möl og tilheyrandi utan höfuðborgarsvæðisins og nefnir Bjartmar sem dæmi losunarstöð Sorpu í Bolaöldu. Svo að það sé sett í samhengi er losunarstöðin í Bolaöldu tæpum 18 kílómetrum frá íbúðabyggðinni í Árskógum og væri því ferð fram og til baka tæpir 36 kílómetrar með tilheyrandi úrlosun efna. Bjartmar bendir einnig á að auk þess að langt sé á milli losunarstöðvar og byggðar sé ekki unnt að endurnýta jarðefnin, heldur sé þeim fargað. Bjartmar segir að í tilfelli malarhauganna við Árskóga sé það „skýr afleiðing af skorti á losunarstöðvum“.

Til stendur að endurnýta jarðefnin úr malarhaugunum við Árskóga í aðra byggingarframkvæmd, en viðkomandi byggingarverktaki fékk nýlega leyfi til jarðvegsskipta á lóðinni sem tók rúmt hálft ár að fá í gegn.

Skriffinnska flækist fyrir

Svo virðist sem skriffinnska geri mönnum erfiðara fyrir. Bjartmar segir að einfalt leyfi til jarðvegsskipta á lóðinni hefði leyst þetta vandamál fyrr og aukið verðmæti lóðarinnar töluvert, en ekki sé gert ráð fyrir slíku leyfi í byggingarreglugerð. „Besta lausnin á málinu væri að endurskoða regluverk sem snýr að jarðvegsframkvæmdum og veita byggingarfulltrúum nauðsynlegar heimildir til útgáfu slíkra leyfa og um leið að hraða á stjórnsýslunni svo að óæskileg söfnun vegna tafa eigi sér ekki stað með tilheyrandi ama fyrir íbúa nærliggjandi hverfa.“

Í fyrradag á morgunfundi umhverfis- og skipulagsráðs Reykjavíkur lagði Kjartan Magnússon borgarfulltrúi Sjálfstæðisflokksins fram tillögu þess efnis að skipulagður yrði hentugur staður innan borgarmarkanna fyrir tímabundið losunarsvæði. Afgreiðslu tillögunnar var frestað til næsta fundar sem verður í næstu viku.