Rauði krossinn á Íslandi hóf í vikunni söfnun vegna neyðar fyrir botni Miðjarðarhafs og til að styrkja mannúðarstarf á svæðinu. Eru samtökin með því að svara neyðarkalli frá alþjóðaráði Rauða krossins.
Í samtali við Morgunblaðið sagði Oddur Freyr Þorsteinsson, kynningar- og fjölmiðlafulltrúi Rauða krossins á Íslandi, að viðbrögðin hefðu verið sæmileg við söfnuninni, en ekki alveg eins sterk og í öðrum söfnunum hjá þeim. Í dag og yfir helgina verður meiri vinna lögð í kynningarstarf vegna söfnunarinnar. „Þá mun fólk vonandi taka við sér, því almennt er fólk mjög tilbúið að taka þátt í svona söfnunum hjá okkur og vill virkilega styðja starfið sem við erum með.“
Tilgangur söfnunarinnar er að styðja hjálparstarfið sem alþjóðaráð Rauða krossins sinnir á þessu svæði, en alþjóðaráðið er sá hluti Rauða krossins sem starfar aðallega á stríðshrjáðum svæðum.
Alþjóðaráðið er að undirbúa sendingu með ríflega 60 tonnum af hjálpargögnum til Gasa auk þess sem það er í sambandi við báða aðila átakanna til að minna á mikilvægi þess að alþjóðleg mannúðarlög séu virt, ásamt því að óska eftir því að gíslar Hamas-samtakanna verði látnir lausir án tafar. „Eins og allir sjá í fréttum hefur ekki gengið nógu vel að fá aðgang og koma gögnum inn á Gasa,“ segir Oddur, en í gegnum alþjóðaráðið er einnig verið að styðja við landsfélög bæði í Ísrael og Palestínu. Oddur segir að bæði landsfélög hafi misst fólk í hjálparaðgerðum og að Rauði krossinn á Íslandi vilji líka styðja við þau.
„Við vonum að þessari söfnun verði vel tekið, enda er þetta ein af betri leiðunum til þess að leggja starfinu lið,“ segir hann.
Til baka
Leita í greinasafni
Prenta grein