Þjóðleikhúsið stendur fyrir dagskrá þar sem fram kemur listafólk úr minnihlutahópum og minnihlutasamfélögum á Íslandi. Dagskrárstjórn og umsjón er í höndum R.E.C Arts Reykjavík, en sá hópur var stofnaður með það markmið að auka sýnileika og þátttöku listafólks í minnihlutahópum í íslensku listalífi og berjast gegn birtingarmyndum af úreltum stereótýpum.
Hópurinn hefur tekið að sér dagskrárstjórn og umsjón með fjórum kvöldum í Þjóðleikhúskjallaranum í vetur þar sem listafólk úr minnihlutahópum verður í öndvegi. Fyrsta kvöld af fjórum verður í kvöld, laugardaginn 21. október, og þar verður boðið upp á hrekkjavökuþema. Fjöldi listamanna kemur fram, Mauricio Villavizar uppistandari, Anya Shaddock, söngkona og lagahöfundur, Nemesis Van Cartier & Kora, sem sýna dans, Smokey Quartz draglistamaður, Dan Ro uppistandari, StripLab Rvk sýnir stangardans og gjörninga auk þess sem hljómsveitin Paragram kemur fram. Táknmálstúlkun verður í boði.
Kvöldunum hefur verið lýst sem menningarkokteil sem endurspeglar hina ótalmörgu fögru óséðu króka og kima íslensks samfélags. Boðið er upp á ýmis listform, lifandi tónlist, uppistand, dragsýningar, söngleik, slam-ljóð, danshópa, burlesque, spuna og söguflutningskeppni, og allt er það flutt af listamönnum úr minnihlutahópum og samfélögum, þ.e.a.s. fólki af lit, LGBTQIA+, fötluðu fólki, innflytjendum, flóttamönnum o.s.frv. Miðar fást á vef Þjóðleikhússins.