Norður
♠ Á2
♥ D1095
♦ ÁKG7
♣ Á87
Vestur
♠ 83
♥ 7
♦ 109865432
♣ G10
Austur
♠ KD1065
♥ 83
♦ –
♣ K65432
Suður
♠ G974
♥ ÁKG642
♦ D
♣ D9
Suður spilar 6♥.
Fyrri hluti Deildakeppninnar fór fram í Síðumúlanum um helgina og var leikur sýndur á BBO í hverri einustu umferð. „Frábært framtak,“ segja fuglarnir, sem fylgdust með af miklum áhuga. Spil úr 4. umferð vakti hjá þeim blendnar tilfinningar: Hálfslemma í hjarta var sögð á sex borðum en hvergi dobluð þrátt fyrir gapandi eyðu austurs í tígli. „Okkur finnst keppendur ekki sýna Theodore Lightner næga virðingu.“
„Auðvitað doblar enginn heilvita maður 6♥,“ sagði Gölturinn, sem var mættur í kaffi til skrafs og yfirlýsinga: „Þeir breyta bara í 6G, sem engin leið er að hagga.“ Það er nokkuð til í því og kannski var það ástæðan fyrir varkárni austurs – en líka hitt, að sums staðar voru NS að þreifa fyrir sér eftir sjö. Alla vega: Aðeins á tveimur borðum hitti vestur á banvænt tígulútspil, annars kom út meinlaus spaði.