Kona um fertugt var í Héraðsdómi Reykjavíkur í gær úrskurðuð í fjögurra vikna áframhaldandi gæsluvarðhald í þágu rannsóknar lögreglu á andláti karlmanns á sextugsaldri í íbúð fjölbýlishúss í Bátavogi í Reykjavík í síðasta mánuði. Konan mun sæta varðhaldi til 21. nóvember. Lögreglan segir í tilkynningu að ekki sé hægt að veita frekari upplýsingar.
Fram hefur komið í máli lögreglu að allt bendi til þess að manninum hafi verið ráðinn bani í íbúðinni. Var konan handtekin á vettvangi og úrskurðuð í varðhald. „Við teljum okkur geta sagt það með vissu að manninum hafi verið ráðinn bani og áverkar á honum eru með þeim hætti, án þess að ég geti farið nánar út í það hvaða áverkar það eru,“ sagði Ævar Pálmi Pálmason aðstoðaryfirlögregluþjónn við mbl.is.