Ingólfi Ómari datt í hug að lauma að mér vísu því nú er farið að frysta á nóttunni: Hélunótt Dvínar þróttur, daprast lund, drunga skjótt mun valda. Læðist hljótt um hæð og grund hélunóttin kalda. Guðmundur Arnfinnsson gefur Viðvörun: Ána mengar…

Ingólfi Ómari datt í hug að lauma að mér vísu því nú er farið að frysta á nóttunni:

Hélunótt

Dvínar þróttur, daprast lund,

drunga skjótt mun valda.

Læðist hljótt um hæð og grund

hélunóttin kalda.

Guðmundur Arnfinnsson gefur Viðvörun:

Ána mengar eldislax,

á því leikur tæpast vafi,

vera þarf á verði strax,

villtur lax svo frið þar hafi.

Um það hræddur er ég dáld-

ið, sem myndi spilla friði,

að hér gervi-greindar skáld

gerist frek á Boðnarmiði.

Gunnar Hólm Hjálmarsson veltir vöngum:

Nýjust tækni nú skal reynd

og nákvæmlega virkja

og sjá hvort tölvu gervigreind

gagnist við að yrkja.

Pétur Stefánsson sendi mér þessar tvær vísur sem skýra sig sjálfar:

Hugur slakar aldrei á.

Unað stakan vekur.

Ellin stjakar æsku frá.

Öllu hraka tekur.

Ég er frískur, fráleitt sljór,

ferskeytt stefin smíða.

Mínir bestu bragaskór

bera mig langt og víða.

Davíð Hjálmar Haraldsson skrifar á Boðnarmjöð: Sjónvarpsviðtal var við rjúpnaskyttu á Egilsstöðum. Sagði skyttan að ekki væri til neins að fara á veiðar á meðan svona hvasst væri og snjólaust; rjúpan sæist ekki fyrr en stigið væri ofan á hana.

Við aðstæðunum óðar brást

er ekkert sást:

Á stígvélum hann sté á tvær

og steindrap þær.

Friðrik Steingrímsson orti um helgina:

Kjararóður konur herða

knýja á um betri hag,

ótal karlar eflaust verða

ósjálfbjarga á þriðjudag.


Guðmundur Arnfinnsson um brotinn heila:

Ketill í Kinn var hugsi

og kunnur að drolli og slugsi,

heimskur sem naut

heilann braut,

og hugsar nú minna sá uxi.