Opin samverustund var haldin í Ástjarnarkirkju í Hafnarfirði klukkan 18 í gær vegna banaslyss sem varð á Ásvöllum á mánudaginn þegar átta ára gamall drengur lést.
Slysið varð við bifreiðastæði á milli Ásvallalaugar og íþróttahúss Hauka. Drengurinn var þar á reiðhjóli þegar hann varð fyrir steypubíl.
Umsjón með opnu samverustundinni höfðu prestar Ástjarnarkirkju, sr. Arnór Bjarki Blomsterberg og sr. Bolli Pétur Bollason, en stundin var hugsuð sem vettvangur fyrir samfélagið til að votta virðingu sína. Lagði fjöldi fólks leið sína í kirkjuna til að sýna samstöðu og stuðning í verki og hlusta á styrkjandi orð á erfiðum tímum.