Breiddin í hópnum loksins nýtt

Íslenska karlalandsliðið í handknattleik slapp með skrekkinn þegar liðið vann nauman sigur gegn Færeyjum, 30:29, í öðrum vináttulandsleik þjóðanna á tveimur dögum á laugardaginn í Laugardalshöll.

Leikurinn var í járnum nánast allan tímann en Elliði Snær Viðarsson kom Íslandi yfir, 28:27, þegar tæplega tvær mínútur voru eftir af leiknum. Færeyingar brunuðu upp í sókn en Viktor Gísli Hallgrímsson varði frá þeim úr dauðafæri og fór um leið langleiðina með að tryggja sigurinn. Aron Pálmarsson kom Íslandi svo tveimur mörkum yfir, 29:27 þegar tæp mínúta var eftir og þann mun tókst Færeyingum ekki að vinna upp.

Viktor Gísli Hallgrímsson varði alls 11 skot í leiknum en Björgvin Páll Gústavsson kom inn á strax í upphafi seinni hálfleiks og náði sér ekki á strik. Viktor Gísli kom aftur inn á þegar um tíu mínútur voru til leiksloka og hjálpaði liðinu að sigla sigrinum heim en hann varði þrjú skot á síðustu fimm mínútunum. Ómar Ingi Magnússon skoraði sex mörk og var markahæstur.

Sóknarleikurinn upp og ofan

Í báðum vináttulandsleikjunum léku Færeyingarnir sjö á sex, nánast allan tímann. Í þau fáu skipti sem Færeyingarnir léku sex á sex í sóknarleiknum stóð íslenska vörnin vel og fékk fá mörk á sig.

Liðið fór nokkrum sinnum í 5-1-vörn líka, til þess að reyna að hrista upp í færeyska sóknarleiknum, og það var ánægjulegt að sjá það aftur hjá liðinu enda margir leikmenn þess sem geta spilað framarlega í þannig varnarleik.

Sóknarleikurinn gekk upp og ofan en það var jákvætt að sjá hversu mikið framlag liðið fékk frá öllum þeim sem fengu tækifæri.

Snorri Steinn Guðjónsson á hrós skilið fyrir að halda öllum leikmönnum á tánum því allir sem komu inn á og fengu tækifæri komu inn á með mikinn kraft.

Sigur er alltaf sigur en eitt af því sem liðið tekur með sér út úr þessu einvígi er hvernig það getur bætt sig í því að verjast sjö á sex. Að öðru leyti þá er hraður leikur íslenska liðsins væntanlega eitthvað sem verður byggt ofan á í vináttulandsleikjunum gegn Austurríki í janúar og svo auðvitað á EM.

Það er búið að tala mikið um breiddina í landsliðinu að undanförnu og það var ánægjulegt að sjá hana loksins nýtta almennilega.