Hulda Kristinsdóttir fæddist í Reykjavík 18. júní 1947. Hún lést á Hrafnistu Nesvöllum 22. október 2023.

Foreldrar hennar voru Gyða Hjálmarsdóttir, f. 3.9. 1913, d. 30.12. 2003, og Kristinn Guðjónsson, f. 10.6. 1912, d. 3.6. 1982.

Systkini Huldu eru: Erla, f. 1931, Hjálmar, f. 1933, d. 2010, Þórir, f. 1934, Hlöðver, f. 1938, Högni, f. 1939, d. 2015, Guðjón, f. 1943, d. 2013, Sverrir, f. 1949, d. 1972, Sæunn, f. 1953, Garðar, f. 1955, d. 1971.

Hulda giftist árið 1967 Hreini Ásgrímssyni, f. 30.5. 1947, d. 7.5. 1986. Hulda var seinna í sambúð með Hjálmari Fornasyni f. 4.12. 1937.

Börn Huldu og Hreins eru: 1) Helga Margrét, f. 4.11. 1965, í sambúð með Örlygi Kvaran. Dætur Helgu eru: Hulda Karen, f. 15.8. 1988, maki Haukur Már Ingvarsson, synir þeirra eru Ingvar Dagur og Óttar Dagur, f. 22.10. 2014.

Lilja Björg, f. 9.4. 1998, maki Ásgeir Tómas Arnarson. 2) Kristín Mikaelína, f. 4.5. 1971, gift Guðlaugi Guðmundssyni. Börn þeirra eru: Harpa Rún, f. 22.12. 1992, Hreinn Óttar, f. 14.9. 1999, og Guðmundur Brynjar, f. 27.12. 2006.

Börn Hjálmars eru: Margrét Elfa, f. 1968, Ríkarður, f. 1970, og Sveinbjörn, f. 1973.

Hulda fluttist ung að árum frá Reykjavík að Kalmarstjörn á Reykjanesi og þaðan í Hafnir. Hulda og Hreinn hófu búskap í Keflavík og bjuggu svo á nokkrum stöðum á landinu en lengst af í Vogum á Vatnsleysuströnd. Frá árinu 1986 bjó Hulda í Keflavík og hóf sambúð með Hjálmari á seinni árum þangað til hún flutti á Hrafnistu Nesvöllum í byrjun þessa árs.

Útförin hefur farið fram í kyrrþey að ósk hinnar látnu.

Með trega, sorg og þakklæti kveðjum við ástkæra móður okkar. Við systurnar erum bara tvær og alltaf gátum við leitað til mömmu, sem var skemmtileg, einstaklega ráðagóð og mikil vinkona okkar og vorum við allar mjög nánar. Mamma sýndi öllu því sem við og fjölskyldur okkar vorum að gera mikinn áhuga. Hún var mikil amma, átti einstakt samband við barnabörnin og var endalaust stolt af sínu fólki. Sem betur fer bárum við gæfu til að umgangast hana mikið, og nánast daglega undanfarin ár.

Líf okkar verður ekki samt án hennar en huggun að vita að nú er hún laus við allar þjáningar en hún var allt of ung þegar heilsunni fór að hraka.

Minningarnar eigum við sem betur fer margar og fallegar.

Elsku yndislega mamma við söknum þín svo mikið, takk fyrir allt, þú varst alltaf kletturinn okkar.

Við látum fylgja einstaklega fallegt ljóð sem mamma samdi til móður sinnar en okkur finnst þetta ljóð einnig eiga vel við frá okkur til hennar í dag.

Móðurást

Mamma mín þú alltaf sagðir,

vertu dugleg Hulda mín

yfir mig þú væng þinn lagðir

verndaðir og breyttir sýn.

Hugur minn er ávallt hjá þér

elsku kæra mamma mín

huggun reyni að senda frá mér,

sjá sumar kemur sólin skín.

Öll þín sár og erfið árin

þú aldrei bognar mamma mín

ég veit þú brosir gegnum tárin

þú ert svo einstök móðir mín.

Þínar dætur,

Helga Margrét og

Kristín M. Hreinsdætur.

Hinn 7. nóvember sl. fylgdum við elsku ömmu okkar til grafar.

Við minnumst hennar með einstakri hlýju og þakklæti í hjarta. Við hefðum ekki getað verið heppnari með ömmu, þrátt fyrir lélegt heilsufar síðustu ár var hún okkur alltaf til halds og trausts og tók alltaf á móti okkur opnum örmum. Það er enginn eins og þú, amma.

Við trúum að móttökurnar hafi verið fallegar og við huggum okkur við að eiga fallegasta verndarengilinn sem vakir yfir okkur.

Elskum þig endalaust og söknuðurinn er ólýsanlegur.

Til þín, amma

Elsku Hulda amma, traustur og góður
vinur,

fallegu minningarnar um hjartað nú ylur.

Alltaf til staðar ef leita þurfti ráða,

okkar stoð og stytta, hvattir til dáða.

Það er erfitt að hugsa sér tilveruna
án þín,

svo ólýsanlega dýrmæt elsku hjartans
amma mín.

Þinn hlýja faðm og besta knúsið,

nærvera þín lýsti upp húsið.

Ó hvað þú ert okkur mikill missir,

okkar helsti klettur, ef þú bara vissir.

Söknuðurinn er sár,

þó minningarnar lifi um ókomin ár.

Það er sunnudagsmorgunn og sólin skín,

þau hafa fengið fallegasta engilinn inn
um hliðið til sín.

Vonum að þú fáir loksins bræðra þinna
svar,

og allt verði aftur eins og áður var.

Niður vangana streyma tárin,

vonandi læknar tíminn hjartasárin.

Að sársauka þínum nú linni,

og finnir þú frið í sálu þinni.

(Harpa Rún Guðlaugsdóttir og
Hulda Karen Baldvinsdóttir)

Þín barnabörn,

Hulda Karen Baldvinsdóttir, Harpa Rún Guðlaugsdóttir, Lilja Björg Stefnisdóttir, Hreinn Óttar Guðlaugsson, Guðmundur Brynjar Guðlaugsson.