Gylfi Þór Þorsteinsson, forstöðumaður fjöldahjálparstöðva, segir hlutina sem betur fer hafa gengið vel fyrir sig undanfarna daga og að markmiðið sé að loka hjálparstöðvunum eins fljótt og hægt er. Gylfi var á línunni í síðdegisþættinum Skemmtilegri leiðin heim með Regínu Ósk, Ásgeiri Páli og Jóni Axel.
„Það þekkja allir sitt hlutverk og þess vegna gengur þetta fumlaust fyrir sig, eins og þið komuð orði að. Þegar keðjan fer að snúast þá vita allir hvað þeirra hlekkur á að gera og þess vegna gengur þetta smurt, sem betur fer,“ segir Gylfi en nú er unnið að því að koma fólki í tímabundið húsnæði.
„Nú er fólk eftir hjá okkur í Keflavík og í Kórnum og það gengur ágætlega að útvega húsnæði. Við verðum að koma fólki í varanlegra húsnæði en íþróttahúsin sem við höfum verið að nota. Vinna okkar er á fullu og er að skila góðum árangri.“
Þegar Ásgeir Páll biður Gylfa um að lýsa andrúmsloftinu á stöðvunum segist hann hafa séð eitt á föstudagskvöld sem hann hafi aldrei séð áður, svokallaða skjálftariðu.
„Fólk nánast steig ölduna þegar það var að koma til okkar. Það var eins og fólk væri sjóveikt og ég hélt á tímabili að einhverjir væru drukknir, sem betur fer reyndist það ekki vera. Þá höfðu þau upplifað marga jarðskjálfta í einu og stutt á milli. Tilveran hringsnerist hjá mörgum þegar þau lögðust niður á beddana hjá okkur. Við þurftum nánast að labba með þeim um gólf til að sannfæra þau um að það væru engir jarðskjálftar á okkar svæði á meðan þau voru hjá okkur. Þau upplifðu jarðskjálfta hvað eftir annað þrátt fyrir að þeir væru ekki til staðar.“
Til baka
Leita í greinasafni
Prenta grein