Kínverski listamaðurinn Ai Weiwei greinir frá því að sýning hans í Lisson Gallery í London sem átti að opna á miðvikudaginn síðasta hafi verið blásin af í kjölfar þess að hann birti færslu á samfélagsmiðlum þar sem hann vísaði til átakanna fyrir botni Miðjarðarhafs. Þá hafi fyrirhuguðum sýningum í New York, Berlín og París einnig verið aflýst. BBC greinir frá. Listamaðurinn hefur um langa hríð verið ötull stuðningsmaður Palestínu og segist ætla að halda þeim stuðningi áfram. Ennfremur er haft eftir honum að gyðingar í Bandaríkjunum séu gríðarlega áhrifamiklir á sviði fjármála, fjölmiðlunar og menningar og að hernaðarstuðningur Bandaríkjanna við Ísrael þýddi að löndin tvö deildu sömu örlögum. Forsvarsmenn gallerísins sögðu í yfirlýsingu að galleríið væri enginn vettvangur fyrir umræðu sem hægt væri að túlka sem rasíska.