Ísrael, Wales eða Pólland mótherjinn

Ísland verður í hópi þeirra tólf liða sem taka þátt í umspili í mars þar sem barist verður um síðustu þrjú sætin í lokakeppni Evrópumóts karla í knattspyrnu, sem fer fram í Þýskalandi næsta sumar.

Þetta komst endanlega á hreint í gærkvöld þegar Tékkar tryggðu sér keppnisrétt á EM með því að sigra Moldóvu á heimavelli, 3:0, í lokaumferð E-riðils keppninnar.

Ef Tékkar hefðu tapað fyrir Moldóvu hefði íslenska liðið þurft að treysta á að Úkraína ynni Ítalíu til að komast í umspilið. Sá leikur endaði með markalausu jafntefli sem þýðir að Ítalía fer á EM en Úkraína í umspilið.

Dregið á fimmtudaginn

Ísland fer annaðhvort í A- eða B-riðil umspilsins en dregið verður á fimmtudaginn um hvort Finnland, Úkraína eða Ísland færist upp í A-riðil umspilsins.

Tuttugu lið fara beint á EM, tvö efstu liðin í hverjum riðli undankeppninnar, og Þýskaland er 21. liðið sem gestgjafi. Að lokum bætast síðan við sigurliðin úr umspilsriðlunum þremur.

Síðasta sætið í kvöld

Nítján af þessum tuttugu sætum eru á hreinu en í kvöld ræðst hvort Króatía eða Wales verður 20. liðið til að komast beint áfram úr riðlakeppninni.

Niðurstaðan í riðlunum tíu er þessi:

A-riðill: Spánn og Skotland fara á EM.

B-riðill: Frakkland og Holland fara á EM.

C-riðill: England og Ítalía fara á EM.

D-riðill: Tyrkland fer á EM. Króatía fer áfram með sigri á Armeníu heima í kvöld, annars getur Wales farið áfram með því að sigra Tyrkland.

E-riðill: Albanía og Tékkland fara á EM.

F-riðill: Austurríki og Belgía fara á EM.

G-riðill: Ungverjaland og Serbía fara á EM.

H-riðill: Danmörk og Slóvenía fara á EM.

I-riðill: Rúmenía og Sviss fara á EM.

J-riðill: Portúgal og Slóvakía fara á EM.

Umspilsriðlarnir þrír

Umspilsriðlarnir þrír líta þannig út fyrir lokaleikina í kvöld:

A-riðill: Króatía eða Wales, Pólland, Úkraína/Ísland/Finnland, Eistland.

B-riðill: Ísrael, Bosnía, Finnland/Úkraína/Ísland (tvö af þremur).

C-riðill: Georgía, Grikkland, Kasakstan, Lúxemborg.

Fyrsta lið mætir fjórða liði og annað lið mætir þriðja liði í undanúrslitum riðlanna 21. mars og sigurliðin mætast í úrslitaleikjum viðkomandi riðla 26. mars. Á fimmtudaginn kemur verður dregið um hvaða lið fá úrslitaleikina á heimavelli en sem kunnugt er mun Ísland þurfa að leika þann úrslitaleik erlendis, þó liðið fái heimaleik, vegna vallarskilyrða hérlendis.

Þrír möguleikar

Þrír möguleikar eru fyrir hendi með mótherja Íslands í undanúrslitum umspilsins.

Ef Ísland dregst í A-riðilinn og Króatía vinnur sér EM-sæti í kvöld verður Wales andstæðingurinn á útivelli.

Ef Ísland dregst í A-riðilinn og Wales vinnur sér EM-sæti í kvöld verður Pólland andstæðingurinn á útivelli.

Ef Ísland dregst í B-riðilinn verður Ísrael andstæðingurinn á útivelli.

Staða í Þjóðadeild dýrmæt

Árangur liða í síðustu Þjóðadeild karla ræður því hvaða lið komast í umspilið, en ekki niðurstaðan í undankeppninni sem lýkur í kvöld. Þau tólf lið sem náðu bestum árangri í Þjóðadeildinni en unnu sér ekki EM-sæti fara í umrætt umspil.

Fjögur efstu lið A-deildar Þjóðadeildarinnar, fjögur efstu lið B-deildar og fjögur efstu lið C-deildar voru örugg með umspilssæti ef þau kæmust ekki beint á EM. Síðan koma næstu lið inn eftir því hve mörg liðanna fyrir ofan þau í röðinni tryggja sér EM-sætin.

Næsta lið í röðinni

Ísland hafnaði í 7. sæti af 16 liðum B-deildar og þar sem tvö lið fyrir ofan Ísland í deildinni, Serbía og Skotland, komust beint á EM, ásamt því að aðeins tvö lið úr A-deildinni unnu sér ekki inn EM-sæti, komst Ísland í umspilið sem næsta lið í röðinni úr B-deildinni.

Eistland var þó fyrsta þjóð inn í umspilið og fer í A-riðilinn sem sigurvegari D-deildar Þjóðadeildarinnar en síðan var Ísland næst í goggunarröðinni sem efst þeirra þjóða sem ekki voru þegar komnar á EM eða í umspil. Þegar ljóst varð í gærkvöld að Tékkar, sem voru í A-deildinni, þyrftu ekki að fara í umspilið, losnaði sæti fyrir Ísland.

Noregur og Svíþjóð sátu eftir

Þau lið í B-deildinni sem sitja eftir með sárt ennið fyrir aftan Ísland eru Noregur, Írland, Svartfjallaland, Svíþjóð og Armenía, auk Rússlands sem fékk ekki að taka þátt í Þjóðadeildinni vegna innrásarinnar í Úkraínu.

Í C-deildinni voru Aserbaídsjan, Kósóvó, Búlgaría og Færeyjar næstu lið í röðinni en tvö C-deildarlið, Tyrkland og Slóvakía, unnu sér sæti á EM.