Þúsundir komu saman í miðborg London í gær og mótmæltu gyðingaandúð.
Samkvæmt AFP-fréttaveitunni hefur borið á aukinni andúð í garð gyðinga á Bretlandseyjum síðustu vikur eða frá því að stríð milli Hamas og Ísraels braust út í október. Samtökin Community Security Trust hafa skráð hjá sér 1.324 tilvik á breskri grundu síðustu 40 dagana sem flokkast sem gyðingaandúð.
Þeir sem tóku þátt í mótmælunum þrömmuðu um borgina og að þinghúsinu með þeim skilaboðum að ekkert umburðarlyndi væri gagnvart gyðingaandúð. Veifuðu mótmælendur myndum af fólkinu sem Hamas rændi. Á laugardaginn kom einnig fjöldi fólks saman í borginni og krafðist þess að vopnahlé yrði gert á Gasasvæðinu.