Ástandið á íbúðamarkaði hér á landi er erfitt um þessar mundir og hefur lengi verið á það bent að þar stefni í óefni. Meginvandinn hefur líka lengi legið fyrir, en hann er sú ofuráhersla sem borgaryfirvöld hafa lagt á að þétta byggð í stað þess að leyfa uppbyggingu nýrra hverfa, sem býður upp á mun hraðari og hagkvæmari byggingar.
En það er fleira sem veldur vandanum. Gylfi Gíslason, framkvæmdastjóri verktakafyrirtækisins Jáverks, sagði í samtali við mbl.is að regluverk skipulags- og byggingamála hefði flækst með hverju árinu: „Af einhverjum ástæðum erum við komin með kerfi sem gerir það að verkum að allt tekur margfalt lengri tíma og er þar af leiðandi miklu dýrara.“
Hann segist vilja byrja með autt blað og skrifa nýjar reglur sem geti verið mun einfaldari en þær sem byggingariðnaðurinn býr við í dag. Þá segist hann telja að hægt væri að einfalda kerfið mikið, ná sama árangri og minnka sóun.
Ekki er að efa að mikið er til í þessu. Skipulagsmál eru óheyrilega flókin og tímafrek og svo tekur við flækjan í tengslum við byggingarnar sjálfar.
Vitaskuld vill enginn að anað sé áfram af hugsunarleysi eða þannig að það valdi hættu. En er ekki full ástæða til að hlusta á þá sem hafa mikla reynslu og gera það sem hægt er til að lækka kostnað og flýta framkvæmdum?
Til baka
Leita í greinasafni
Prenta grein