Kúrir á bak við tré

Ingólfur Ómar sendi mér póst á sunnudag, sagði að nú skyggði ansi fljótt og dagsbirtan varði stutt:

Húmið ugg að dregur drótt

dagur hnugginn grætur.

Brátt á glugga birtist skjótt

blakkur skuggi nætur.

Helgi R. Einarsson sendi mér lausn á laugardagsgátunni og lét tvær limrur fylgja með þeirri skýringu að þátturinn Tungutak í Morgunblaðinu var m.a. um á og þá varð þessi til:

Á

Bjarni bóndi á

bænum Syðri-Á

konu á,

kú og á,

samt eitthvað vantar á.

Nískupúkinn

„Hungrið hrjáir þig,“

hreytti' ann oft í mig.

En hrotti margur

heimskur, argur,

heldur mig sig.

Á Boðnarmiði yrkir Magnús Halldórsson limru:

Hann Ágúst var alsæll í trúnni,

þótt ónotum sætti hjá frúnni.

Af því að hann,

yfirleitt fann

eindreginn stuðning frá kúnni.

Jón Jens Kristjánsson yrkir Á úthallanda gylliboðahelgi:

Um helgina fór ég víst margs á mis

margt var þó boðið heimsins glys

leit samt á heilræði laus við þys

á látt' ekki snuða þig .is

Guðrún Bjarnadóttir yrkir Á leið suður:

Hérna Kotstrandarkirkja

kúrir á bak við tré.

Held ég áfram að yrkja

eða dreg mig í hlé?

Limra eftir Stein Kristjánsson:

Hún Kaðlín sem kennd var við Gjögur,

svo kotroskin, húsleg og mögur

byrjaði að búa

með Bergsveini Dúa

á Fornhaga 24.

Friðrik Steingrímsson um Grasreykingar í ráðhúskjallara, mbl.is:

Eftir funda þvarg og þras

og þreytu dagsins anna,

í bílageymslu bíður gras

borgarstjórnar manna.

Hjörtur Benediktsson sbr. Þingmaður of lengi á salerni. Sjá mbl. og dv.:

Um veröldu fer nú sú vissa

samt virðast hér fáir mjög hissa

þeir eru mjög spes

um það ég les

að píratar leng'er' að pissa.¶ Hann Skeggi fékk skammir hjá frúnni,¶ því skipstjóri var hún í brúnni,¶ hún sagði hann gauð¶ og gagnslausan sauð,¶ sem best væri kominn hjá kúnni.¶ Menn eru að komast í jólaskap. Jón Jens Kristjánsson yrkir:¶ Á jólunum oft berast bjarmar gylltir¶ um blásnar heiðar, dalverpi og hvilftir¶ um jörðu fara þᶠjafnan til og frᶠjólasveinar einn og áttavilltir.¶ Öfugmælavísan:¶ Stóran má hafa stein í dufl,¶ standa á járni heitu,¶ úr þokunni gera þykkan kufl.¶ þurrka traf í bleytu.¶ Halldór Blöndal