Íslenska U20 ára landslið kvenna í knattspyrnu sigraði U18 ára landslið Svía, 1:0, í vináttuleik sem fram fór í knattspyrnuhúsinu Miðgarði í Garðabæ í gær.
Sigdís Eva Bárðardóttir úr Víkingi skoraði sigurmarkið á 54. mínútu með skoti af markteigshorninu hægra megin eftir að Vigdís Lilja Kristjánsdóttir úr Breiðabliki stakk sér inn í vítateiginn vinstra megin og renndi boltanum fyrir markið.
Leikurinn var liður í undirbúningi íslenska liðsins fyrir úrslitaleik gegn Austurríki á mánudaginn kemur um sæti í lokakeppni heimsmeistaramóts U20 ára landsliða. Ísland og Austurríki höfnuðu í 5.-6. sæti í lokakeppni EM í sumar og þurfa því að spila aukaleik um sæti á HM 2024 sem fer fram í Kólumbíu.
Svíar komu hingað með U18 ára lið sitt og leika aftur gegn Íslandi í Miðgarði klukkan 12 á föstudag en þá mæta sænsku stúlkurnar íslenskum jafnöldrum sínum í U18.