Daniel Love, nýjasti leikmaður Hauka, fór mikinn þegar liðið hafði betur gegn Hetti, 93:85, í 9. umferð úrvalsdeildar karla í körfuknattleik í Ólafssal í Hafnarfirði í gær en Love skoraði 26 stig, tók sex fráköst og gaf eina stoðsendingu í leiknum. Þetta var fyrsti sigur Hauka síðan 26. október þegar liðið hafði betur gegn Hamri í Ólafssal en Deontaye Buskey var stigahæstur hjá Hetti með 23 stig, fjögur fráköst og fjórar stoðsendingar.
Emil Karel Einarsson og Darwin Davies voru stigahæstir hjá Þór úr Þorlákshöfn þegar liðið lagði Íslandsmeistara Tindastóls, 96:79, í Þorlákshöfn en þeir skoruðu 18 stig hvor. Adomas Drungilas var stigahæstur hjá Tindastól gegn sínum gömlu liðsfélögum með 17 stig, níu fráköst og tvær stoðsendingar.
Pétur Ingvarsson og lærisveinar hans í Keflavík höfðu betur gegn hans gömlu lærisveinum í Breiðabliki, 100:86, í Keflavík en Remy Martin fór á kostum hjá Keflavík í leiknum, skoraði 36 stig, tók sjö fráköst og gaf sex stoðsendingar. Keith Jordan var stigahæstur hjá Breiðabliki með 32 stig, fjórtán fráköst og eina stoðsendingu.
Njarðvíkingar eru einir á toppnum eftir öruggan sigur gegn Hamar, 109:85, í Hveragerði en Mario Matasovic skoraði 26 stig fyrir Njarðvík og tók sjö fráköst í leiknum. Julian Moore var stigahæstur hjá Hamri með 30 stig, níu fráköst og sjö stoðsendingar.
Kristinn Pálsson var svo stigahæstur hjá Val þegar liðið lagði Grindavík að velli, 96:83, á Hlíðarenda en Kristinn skoraði 28 stig, tók fjögur fráköst og gaf tvær stoðsendingar í leiknum. Dedrick Basile var stigahæstur hjá Grindavík með 26 stig, fjögur fráköst og fjórar stoðsendingar.
Til baka
Leita í greinasafni
Prenta grein