Norður
♠ D102
♥ Á10643
♦ KD
♣ Á83
Vestur
♠ 65
♥ G9
♦ G8752
♣ KG95
Austur
♠ K9842
♥ 8
♦ 109643
♣ 64
Suður
♠ ÁG3
♥ KD752
♦ Á
♣ D1072
Suður spilar 6♥.
Hálfslemma þarf að vera að minnsta kosti 50% til að teljast viðunandi í sveitakeppni. Þá vega ágóði og tap salt og jafnast út með tímanum. Hjartaslemman að ofan er nokkuð undir 50% markinu – byggist á svíningu í spaða og síðan þarf að leysa laufið upp á einn tapslag. En slemman freistaði margra á síðasta spilakvöldi BR, var sögð á átta borðum af tíu og vannst sex sinnum. Einn sagnhafi fékk út hjálplegt lauf frá kóngnum, aðrir unnu slemmuna eftir útspil í tígli eða spaða, sem ekkert gefur.
Sagnhafarnir sigursælu spiluðu allir eins: aftrompuðu mótherjana, tóku tvo slagi á tígul og þrjá á spaða með svíningu. Síðan var litlu laufi spilað úr borði á tíuna heima. Með þessu móti vinnst slemman ef austur á gosann eða vestur kóng og gosa, eins og var raunin í þetta sinn.