Þeir fjárfestar sem tóku þátt í hlutafjárútboði Ísfélagsins munu greiða fyrir bréf sín í félaginu í dag. Bréfin verða afhent nýjum hluthöfum á föstudag, 8. desember, og tekin til viðskipta í Kauphöllinni sama dag.
Hlutafjárútboði Ísfélagsins lauk sl. föstudag. Alls bárust um 6.500 áskriftir að andvirði um 58 ma.kr., sem samsvarar um fjórfaldri eftirspurn, þar sem til stóð að selja hluti að andvirði um 16 milljarða króna í útboðinu. Heildarfjöldi seldra hluta í útboðinu nam um 118,9 milljónum hluta og heildarsöluandvirði útboðsins nam tæplega 18 milljörðum króna. Í áskriftarbók A var útboðsgengið 135 kr. á hlut en í áskriftarbók B, sem ætluð er fagfjárfestum, er gengið 155 kr. á hlut. Hluthafalisti verður birtur á föstudag.