Hörð átök voru í gær milli Ísraelshers og Hamas-liða í borginni Khan Yunis á suðurhluta Gasasvæðisins. Alþjóðaheilbrigðismálastofnunin (WHO) segir ástandið á svæðinu versna með hverjum deginum sem líður.
AFP-fréttastofan hefur eftir Richard Peeperkorn, fulltrúa WHO á svæðum Palestínumanna, að stofnunin geti ekki veitt þá aðstoð sem þarf og hörmungarástand ríki á svæðinu. „Fjöldi fólks er örvinglaður og nánast í stöðugu áfalli.“
James Elder talsmaður UNICEF segir ástandið á Gasasvæðinu óboðlegt og að hvergi á svæðinu sé fólk í raun óhult. Í flóttamannaskýlum séu þúsundir manna og liðlega 400 manns séu um hvert salerni. „Það er ekkert vatn, engin aðstaða, ekkert skjól fyrir veðri og vindum.“