Barbarar mæta tvíefldir til leiks

Rakarakvartettinn Barbari hélt fyrstu jólatónleika sína í Dómkirkjunni í Reykjavík á snjóþungum degi í fyrra, 17. desember, og reynslunni ríkari býður hann til veislu á sama stað en degi seinna í dagatalinu í ár, klukkan 20.00 mánudaginn 18. desember. „Við sáum að 17. desember gengur ekki,“ segir Gunnar Thor Örnólfsson, einn stofnenda kvartettsins.

Fjórir menntaskólapiltar stofnuðu kvartettinn þegar þeir voru á lokaári í MR haustið 2013. Barbari hefur víða komið fram síðan en mannaskipti hafa orðið, tveir hætt og aðrir komið í staðinn. Liðsmenn nú eru Gunnar Thor, Karl Friðrik Hjaltason, Páll Sólmundur H. Eydal og Ragnar Pétur Jóhannsson.

Skyggja á Júróvisjón

„Við syngjum í bandarískum stíl og erum óttalegir barbarar í því,“ segir Gunnar Thor um nafn kvartettsins, sem sérhæfir sig í svonefndri rakarastofutónlist, þar sem líflegur hljómagangur, þéttur samhljómur og mikil raddleg tilþrif njóta sín. Ragnar Pétur er bassasöngvari kvartettsins en hinir skiptast á um að leiða sönginn og syngja aðrar raddir. „Það er enginn rakari í hópnum en við erum allir mjög virkir söngvarar og syngjum í hinum og þessum kórum.“ Rakarakvartettinn hafi einnig sungið víða og meðal annars haldið Valentínusartónleika. „Við höfum sungið á árshátíðum, í afmælum, á vinnustaðaskemmtunum og svo framvegis.“ Hann bætir við að Karl Friðrik og Ragnar Pétur séu atvinnusöngvarar og sá síðarnefndi hafi meðal annars sett upp óperur. „Palli er náttúrutalent og ég var í Tónlistarskólanum í Reykjavík.“

Upphaflegi hópurinn keppti í söngkeppni framhaldsskólanna á síðasta ári í MR. „Við sigruðum í keppninni í MR, en náðum ekki alveg jafngóðum árangri í úrslitakeppninni á Akureyri, vöktum samt mikla lukku,“ rifjar Gunnar Thor upp.

„Við höfum uppfært dagskrána frá því í fyrra og syngjum alls konar jólaslagara, Hollywood-slagara í anda Nats Kings Coles, Franks Sinatra og annarra í barbershop-útsetningum,“ segir Gunnar Thor um jólatónleikana, en miðar eru seldir á netinu (tix.is) og við innganginn. Kvartettinn hafi fengið inni í Dómkirkjunni með æfingar, tengingin eigi sér langa sögu og því sé kirkjan eðlilegur tónleikastaður. „Þrír okkar hafa sungið með Dómkórnum og þegar við vorum í MR-kórnum forðum daga var Kári Þormar fyrrverandi dómorganisti kórstjóri okkar.“

Söngvakeppni evrópskra sjónvarpsstöðva verður í Malmö í Svíþjóð í maí, undankeppnin 7. og 9. maí og úrslitakeppnin 11. maí. Barbari hefur sett markið enn hærra og ætlar að taka þátt í alþjóðlegri keppni rakarastofusöngvara á vegum Society of Nordic Barbershops Singers. „Hún verður í Helsingborg 9.-11. maí, sömu helgi og Júróvisjón verður í Malmö,“ segir Gunnar Thor og lætur í það skína að Júróvisjón eigi eftir að falla í skuggann af keppninni í nágrenninu. „Og við vonumst líka til að sjá sem flesta í Dómkirkjunni klukkan átta á mánudagskvöld.“