Árleg hefð þar sem börn hjálpa börnum

„Fyrst var þetta nú bara að láta gott af sér leiða og efla samkennd og samhug meðal nemenda og starfsfólks,“ segir Sævar Þór Helgason, skólastjóri í Grunnskólanum í Hveragerði, en síðastliðin ár hafa nemendur og starfsfólk skólans haldið góðgerðarþema í nóvember.

Hafa safnað 11,4 milljónum

Afrakstur góðgerðardagsins hefur verið afhentur hinum ýmsu félagasamtökum frá árinu 2015 en málefnin hafa verið valin með tilliti til þess að börn njóti á einhvern hátt góðs af styrknum. Þá hafa umtalsverðar fjárhæðir safnast á þessum árum með sölu á vörum og eins hafa fjölmörg fyrirtæki stutt við söfnunina með beinum peningastyrkjum. Samtals hafa verið veittar rúmar 11,4 milljónir króna í styrki á þessum níu árum en í ár fengu samtökin Ljónshjarta tveggja milljóna króna styrk frá skólanum.

Segir Sævar Þór að með árunum hafi þráðurinn í þessu framtaki verið sá að börn hjálpi börnum en í dag sé þetta í raun orðið að ómissandi hefð á þessum árstíma í Hveragerði.

„Þetta er stór partur af aðdraganda jólanna. Það er hópur krakka sem nýtur þess að vera í svona uppbroti, vera að framleiða allt mögulegt. Við höfum alltaf kerti og svo eru fullt af fyrirtækjum sem styrkja þetta höfðinglega þannig að hráefniskostnaður er eiginlega enginn,“ segir hann.

Haldið í íþróttahúsinu

„Á góðgerðardaginn sjálfan
erum við með markaðstorg í íþróttahúsinu því þetta er orðið svo stórt að við getum ekki haft þetta lengur inni í skólanum. Þá er kaffihús og fjöldi bæjarbúa mætir í kaffi til okkar. Það er því mikil samheldni og stemning í kringum þetta,“ segir Sævar Þór og bætir við að ein vinsælasta varan síðastliðin ár sé heimagerður brjóstsykur.

„Við byrjum því að framleiða hann löngu áður og nú er boðið upp á brjóstsykursgerð sem val á unglingastigi.“

Segir hann að lokum að verkefnið sé krefjandi fyrir bæði starfsfólk og skipuleggjendur en á móti að sjálfsögðu fyrirhafnarinnar virði.

„Svona verkefni efla samkennd og það er eitthvað sem við þurfum að gera í mannlegu samfélagi í dag.“