Tilbúin að endurskoða gjaldskrár

Góður vilji virðist fyrir því meðal forystumanna nokkurra stærstu sveitarfélaga landsins að endurskoða áform um hækkanir gjaldskráa, geti slíkt verið innlegg til þjóðarsáttar í kjarasamningum. Stóra verkefnið þar sé að ná niður verðbólgu og háum vöxtum. Með þeim viðhorfum er fylgt þeim tóni sem bæjarstjórn Akraness sló með yfirlýsingu rétt fyrir áramót. Þar er ítrekað mikilvægi þess að atvinnulífið og opinberir aðilar leggist á eitt við að skapa jafnvægi í efnahagsmálum. Minnt er þar á að gjaldskrá Akranesbæjar hafi síðustu árin hlutfallslega lækkað.

Leggja sitt af mörkum

„Reykjavíkurborg er tilbúin til þess að draga úr boðuðum breytingum á gjaldskrám ef slíkt getur stuðlað að gerð kjarasamninga með hóflegum launahækkunum,“ segir Einar Þorsteinsson, formaður borgarráðs og væntanlegur borgarstjóri. Einar lýsti í nóvember sl. þeirri skoðun að ef aðilar vinnumarkaðarins myndu semja á hófsömum nótum væri borgin til í að leggja sitt af mörkum. Þessi afstaða var staðfest í borgarráði fyrir jól. Hann fagnar yfirlýsingu Akranesbæjar. Samþykkt hafi verið í borgarráði í lok desember – þvert á flokka – að hækka til dæmis leikskólagjöld aðeins um 3,5% á næsta ári ef aðilar vinnumarkaðarins ná hófsömum samningum.

„Gjarnan eru skuldir sveitarfélaga verðtryggðar, svo á þær leggjast verðbætur og vextir eru háir. Þá hækkar almennt verðlag allan rekstrarkostnað. Þó ég tali aðeins fyrir Reykjavíkurborg held ég að flest okkar á sveitarstjórnarstiginu sjái að það eru miklir hagsmunir fólgnir í því að ná þjóðarsátt sem miðar að því að lækka vaxtastig og minnka verðbólgu,“ segir formaður borgarráðs. „Við erum tilbúin að endurskoða þegar samþykkta hækkun gjaldskrár ef það má verða til að greiða fyrir þjóðarsátt,“ segir Kjartan Már Kjartansson bæjarstjóri í Reykjanesbæ. Heimir Örn Árnason, formaður bæjarráðs Akureyrar, talar á sömu nótum.

Nýtt verklag

„Ef vel tekst til og samið verður um hóflegar launahækkanir mun það sjálfkrafa leiða til hóflegra gjaldskrárhækkana hér,“ segir Ásdís Kristjánsdóttir bæjarstjóri í Kópavogi. Hún vekur athygli á því að Kópavogsbær hafi tekið upp nýtt verklag. Í stað þess að hækka gjaldskrár í upphafi hvers ár miðað við gefnar forsendur um verðlagsþróun, eins og víða er gert, taki gjaldskrár Kópavogsbæjar nú breytingum 2-4 sinnum á ári. Sé þá miðað við þróun kostnaðarliða í rekstri.

„Gjaldskrárhækkanir Kópavogsbæjar munu því þróast í samræmi laun og verðlag,“ segir Ásdís Kristjánsdóttir.

„Við í Árborg erum auðvitað tilbúin í samvinnu og að leggja okkar lóð vogarskálar til að greiða fyrir kjarasamningum,“ segir Fjóla Kristinsdóttir bæjarstjóri. Hún kveðst raunar hafa vænst þess lengi að Samband íslenskra sveitarfélaga efndi til samtals um færar leiðir sem greitt gætu fyrir samningagerð. Minnir þó á að skuldir sveitarfélagsins séu miklar og staðan þung. Nú á nýju ári sé gert ráð fyrir hækkun á gjaldskrám um að jafnaði 7,7% til samræmis við verðlagsbreytingar. Þá hafi álagningarhlutfall útsvars verið hækkað í 16,2% skv. samkomulagi við innviðaráðuneytið og eftirlitsnefnd um fjármál sveitarfélaga. Þetta hafi verið gert í því skyni að rétta fjárhag Áraborgar við.

„Staða sveitarfélagsins og samkomulag við eftirlitsnefnd gerir okkur erfitt fyrir hvað varðar lækkun gjaldskrár og slíkt. Við erum þó alltaf tilbúin í samtal til að liðka fyrir samningargerð,“ segir Fjóla.