Breski leikarinn Tom Wilkinson, sem einna þekktastur er fyrir hlutverk sitt í myndum á borð við Með fullri reisn (The Full Monty), Shakespeare In Love og The Best Exotic Marigold Hotel, er látinn 75 ára að aldri.
Breska ríkisútvarpið greindi frá því að í yfirlýsingu, sem umboðsmaður leikarans gaf fyrir hönd fjölskyldunnar, hefði komið fram að hann hefði orðið bráðkvaddur á heimili sínu laugardaginn 30. desember í faðmi fjölskyldunnar.
Wilkinson vann Bafta-verðlaunin árið 1997 fyrir hlutverk sitt sem Gerald í myndinni Með fullri reisn en hann hlaut alls sex Bafta-tilnefningar á ferli sínum auk þess að vera tvívegis tilnefndur til Óskarsverðlauna fyrir hlutverk sitt í bíómyndunum Michael Clayton og In the Bedroom. Þá hlaut hann Emmy-verðlaun fyrir hlutverk sitt sem Benjamin Franklin í framhaldsþáttaröðinni John Adams og tilnefningu til Emmy-verðlauna fyrir að leika Joe Kennedy, föður Johns F. Kennedys fyrrverandi Bandaríkjaforseta, í þáttunum The Kennedys.