Skoski söngvarinn Lewis Capaldi hefur staðfest að hann muni framlengja hlé sitt frá tónleikum. Hann hefur ekki komið fram síðasta hálfa árið og segir það hafa haft góð áhrif á heilsuna. BBC greinir frá. Í miðju tónleikaferðalagi í júní tilkynnti Capaldi að hann myndi taka sér hlé frá tónleikadagskránni en þá hafði hann lent í vandræðum með röddina á tónleikum sínum á Glastonbury-hátíðinni.
Í nýlegri færslu á samfélagsmiðlum skrifar hann að hann sé að vinna með fagaðilum til þess að meðhöndla Tourette-heilkenni og kvíða. „Það gleður mig að tilkynna að ég hef fundið fyrir augljósum framförum á hvoru tveggja síðan ég ákvað í júní að taka mér frí,“ skrifaði hann.
Þar kom einnig fram að lengri útgáfa af plötunni Broken By Desire To Be Heavenly Sent, með fimm nýjum lögum, kæmi út á nýársdag.