Jón Gissurarson óskar félögum sínum á Boðnarmiði gleðilegs nýs árs með þökkum fyrir það gamla:
Lítum yfir liðið ár
ljúf og kát í sinni,
þó að ógni írafár
allri veröldinni.
Árið nýja verðum við
vermd af ljóðabrunni,
einnig mun það gefa grið
gömlu ferskeytlunni.
Ingólfur Ómar Ármannsson bætti við:
Lífið brosir bjart við mér
bögu reifur kyrja.
Þegar nýja árið er
aðeins rétt að byrja.
Gunnar J. Straumland er á svipuðum nótum:
Morgunfagur máni skín,
minni sagan vefur.
Nýjan brag og nýja sýn
nýársdagur gefur.
Hallmundur Kristinsson yrkir:
Lengi dags til lands og sjós
lífsins bárur rísa.
Er þetta ekki ansi góð
áramótavísa?
Ekki gott ef satt er – limra eftir Jóhann S. Hannesson:
Það er ekki andskotalaust
hvað undarlegt fólk er í haust;
jafnvel biskupinn kvað
sjást með klámmyndablað
og kyrjandi popplög við raust.
Limra eftir Kristján Karlsson:
Guðmundur bóndi á Gnípu
var gleyptur af mýrisnípu
fyrir kunnuglegt ávarp
og óþarfa smákarp.
Lát þetta í þína pípu.
Úr Sjöundu Davíðsbók Haraldssonar:
Et böðullinn Hafliða hjó
á höggstokk og maðurinn dó
rak fólkið upp org
í felmtran og sorg
og grátklökkt en höfuðið hló.
Árni Jónsson Stóra-Hamri orti:
Öslaði gnoðin, beljaði boðinn,
blikaði voðin, kári söng,
stýrið gelti, aldan elti,
inn sér hellti á borðin löng.
Bóndi missti ráðskonu sína. Þórarinn í Kílakoti í Kelduhverfi orti:
Stormar blása, bliknar rós,
brotnar unn á söndum.
Bragi í Ási digra drós
dró úr Gunnars höndum.¶ Við gil sem er kennt við kið¶ að kvonbænum sá ég Hall.¶ „Já,“ sagði Jóna við¶ Jarpkollupollafjall.¶ Öfugmælavísan:¶ Göngutófu grönnu hár¶ gerðu í net að skubba,¶ búðu til úr blýi flár,¶ en beyki þunnt í kubba.¶ Halldór Blöndal