Skjálftahrina hófst í Grímsvötnum í gær um klukkan 16 og mældust sex jarðskjálftar af stærðinni 1 eða stærri. Var það talið óvenjulegt að mati Veðurstofu Íslands og var því fluglitakóða fyrir svæðið breytt úr grænum í gulan. Gulur fluglitakóði merkir í þessu tilfelli að eldstöðin sýni merki um virkni, umfram venjulegt ástand.
Böðvar Sveinsson, náttúruvársérfræðingur á Veðurstofunni, sagði skjálftana óvenjulega marga á þetta skömmum tíma, í samtali við mbl.is.
Veðurstofan gaf út tilkynningu með skýringu á breytingunni á litakóðanum stuttu seinna. Þar sagði að síðustu fjóra mánuði hefði jarðskjálftavirkni í Grímsvötnum verið meiri en það sem teldist til venjulegrar bakgrunnsvirkni. Frá því í byrjun desember hefði vatn runnið úr Grímsvötnum sjálfum en síðustu tvær vikur hefði ekki verið hægt að mæla breytingar vegna bilunar í búnaði. Hugsanlegt þykir að þetta sé vegna losunar vatns en erfitt mun vera að staðfesta að svo stöddu. Litakóðinn verður metinn að nýju í dag.
Grímsvötn eru langvirkasta eldstöð landsins og um nokkurra ára skeið hefur hún verið talin tilbúin í enn eitt eldgosið. Í ágúst var eldstöðin þegar komin í hærri stöðu en hún var fyrir síðasta gos sem varð 21. maí árið 2011.
Til baka
Leita í greinasafni
Prenta grein