Á Boðnarmiði yrkir Benedikt Jóhannsson um nýársheit:
Ég hástemmd nýárs heit ei strengi,
þau halda jafnan ekki lengi,
þó held ég yrði huga léttir
að hlusta aðeins minna' á fréttir.
Magnús Halldórsson um stjórnarheimilið:
Allir treysta öllum þar,
engum þarf að hygla.
Enginn gefur einlægt svar.
(Ætli þar sé mygla)
Gunnar Hólm Hjálmarsson útskýrir:
Ýmsir telja afsögn skjól
eða litlu breyti.
Alltaf má fá annan stól
og annað ráðuneyti
Magnús Halldórsson yrkir:
Tæpast neinn á taugum fer,
ef titli enga sviptum.
Flóttaleiðin fundin er
og felst í stólaskiptum.
Jón Atli Játvarðarson skrifar: Það er einhver þrautakóngur í spilastokk þingmanna til að þeir hlakki meira til endurkomu sinnar á Alþingi eftir óþægilega langt jólahlé:
Umbi er faglegur, alls enginn glanni,
allur samt þingheimur volandi.
Svandís braut víst á brothættum manni,
sem beinlínis var ekki þolandi.
Magnús Halldórsson vitnar í fréttir um að Suður-Kórea hafi bannað framleiðslu á hundakjöti:
Með Svandísi þar svotla stund,
að sönnu væri fengur,
ef súran hval og saltan hund,
þar selja má ei lengur.
Ingunn Björnsdóttir hélt áfram:
Svandís gæti gefið þeim
góða spyrðu af rengi.
Síðan aftur haldið heim
og hundum fagnað lengi.
Kristján H. Theodórsson yrkir:
Hriktir í og hreysið skekið,
hrútar lausir krónni í.
Eftir verður eflaust tekið,
upp mun rísa stjórnin ný.
Limran Tálsýnir eftir Eyjólf Óskar Eyjólfsson:
Menn ruddust með fjármagnsins fána
og studdu svo krossmenn og kjána
og fundu með hryggð
undir hamri og sigð
að hugmyndir eldast og þrána.
Öfugmælavísan:
Séð hef ég kýrnar vinda voð,
veiðibjöllu steikja roð,
lóminn þamba sjóðheitt soð,
selinn eta úr básum moð.