Ólafur E. Jóhannsson
oej@mbl.is
Til skoðunar er í umhverfis-, orku- og loftslagsráðuneytinu að leggja fram frumvarp á Alþingi um sérlög til að greiða fyrir styrkingu flutningskerfis raforku á milli Norðurlands og Suðvesturlands. Til þess mun þó ekki koma verði gerðar nauðsynlegar breytingar á skipulagi í sveitarfélögum á Norðurlandi, sem ný flutningslína mun liggja um.
Þetta staðfestir Guðlaugur Þór Þórðarson ráðherra málaflokksins í samtali við Morgunblaðið. Hann hitti sveitarstjórnarfólk á Akureyri, í Hörgársveit, Skagafirði og Húnabyggð fyrr í vikunni þar sem þessi mál voru rædd. Segir hann samtölin hafa verið góð og að sveitarfélögin séu þegar búin að leggja mikla vinnu í verkefnið og hann vænti góðs af samstarfi við þau.
„Nauðsynlegar endurbætur á flutningskerfi raforku krefjast þess að lagðar verði nýjar raflínur til að auka flutningsgetu kerfisins, en til að svo megi verða þarf að gera breytingar á skipulagi í sveitarfélögunum til að heimila lagningu línanna. Þar má ekkert út af bregða og okkur liggur á,“ segir Guðlaugur Þór og segist hafa fundið fyrir skilningi sveitarstjórnarfólksins á því að þarna sé um þjóðaröryggismál að ræða.
Liggur á í orkumálum
„Ég og forstjóri Landsnets töluðum milliliðalaust við sveitarstjórnarfólkið og ástæðan er mjög einföld; okkur liggur mjög á í orkumálum vegna þeirrar kyrrstöðu sem verið hefur undanfarin 15 til 20 ár. Einn liður vandamálsins liggur í flutningskerfinu,“ segir Guðlaugur Þór.
„Vegna mikilvægis málsins lét ég líka vita af því að eitt af því sem verið er að skoða er lagasetning til að heimila nauðsynlega styrkingu á flutningskerfinu, en ég vona að til þess þurfi ekki að koma. Ég hef fulla trú á forystufólki og íbúum þessara svæða, að það vinni með okkur að framgangi málsins,“ segir hann.
Guðlaugur Þór bendir á að ef skipulagsvinna vegna styrkingar flutningskerfisins gangi vel og að aðrir þættir sem þessu tengjast, svo sem samningar við landeigendur, megi búast við því að endurbætt tenging verði komin á milli Akureyrar og Grundartanga í Hvalfirði árin 2027 eða 2028, enda sé framkvæmdin stór og línurnar margar.
„Vandinn er þessi: Það er komið að skuldadögum, vegna þess að við gerðum ekkert í grænum raforkumálum í 15 ár og í hitaveitunni í 20 ár. Það tekur tíma að vinda ofan af þessu og við verðum að vinna eins hratt og mögulegt er,“ segir Guðlaugur Þór Þórðarson.