Þór úr Þorlákshöfn styrkti stöðu sína í toppbaráttu úrvalsdeildar karla í körfuknattleik í gærkvöld með því að sigra Stjörnuna, 98:92, í Þorlákshöfn.
Þórsarar eru því áfram í hópi fjögurra efstu liða og eru nú fjórum stigum á undan Stjörnunni sem situr í áttunda sætinu í harðnandi baráttu um að komast í úrslitakeppnina.
Stjörnumenn stóðu vel að vígi því þeir voru yfir, 90:84, þegar stutt var eftir en Þórsarar skoruðu fjórtán stig gegn tveimur á lokakaflanum og tryggðu sér sigurinn.
Jordan Semple skoraði 26 stig og tók 17 fráköst fyrir Þór, Darwin Davis gerði 20 stig og Tómas Valur Þrastarson 18.
Ægir Þór Steinarsson átti stórleik fyrir Stjörnuna og skoraði 28 stig og gaf tíu stoðsendingar að auki. James Ellisor gerði 22 stig.