Gátan er eftir Pál Jónasson í Hlíð:
Oft það fréttir færir þér,
við fiskiveiðar notað enn,
konur höfðu í hári í denn
hengt á staura og virkar enn.
Sigmar Ingason á þessa lausn:
Í netheimum má fréttir margar finna.
Fiskveiðum með netum margir sinna.
Í netgirðingarhólfi híma rollur.
Hárnet fyrr bar margur frúarkollur.
Guðrún B. leysir gátuna:
Alnetið er okkar viska.
Á sjó net til stórra högga.
Hárnet varnar hári á diska.
Í handbolta þarf netið Bjögga.
Úlfar Guðmundsson á þessa lausn:
Á neti fletti góðri frétt,
fyllti bretti þorskur slétt,
í hárið setti snótin þétt,
samband þetta bætir létt.
Þórunn Erla Sighvats svarar með bestu kveðjum ofan af Skaga:
Fréttanetið fræðslumátinn góði,
frjáls að netaveiðum ennþá er,
hárnet kvenna horfin og úr móði,
heimatúnið girt með neti hér.
Lausnin vildi líta svona út hjá Helga R. Einarssyni:
Ekki víðsýnn eður klár,
efst á blað þó set
orðin: Fiski-. inter-, hár-
og girðingarnet.
Sjálfur skýrir Páll gátuna svona:
Fréttir alnet færir þér
fiska í netin sjómenn enn.
Konur hárnet höfðu í denn
hengt á staura vírnet enn.
Síðan er ný gáta eftir Pál:
Bros hún vekur barni hjá,
í bílum öllum líta má,
kýrnar hana í fjósi fá,
finnst oft galli henni á.
Þessar limrur fylgdu lausn Helga R. Einarssonar:
Elliglöp?
Er Magnús elliæra
Ásta tók að mæra
hann rámaði' í
enn á ný
eitthvað milli læra.
Þá ljúfu lét þó vera
og lét á engu bera
því gleymt víst hafði
hann að bragði
hvað næst bæri' að gera.
Engum er Auðbjörg lík,¶ indæl og skilningsrík¶ svo augljóst er mér¶ að ungfrúin er¶ ekki í pólitík.¶ Limra eftir Kristján Karlsson:¶ Af ástæðum ótilgreindum¶ ef til vill flóknum og leyndum¶ hann gat ekki pissað¶ sem gjörði oss svo hissa að¶ við gátum ei heldur sem reyndum.¶ Í Leir segir frá því að Óttar Einarsson, búsettur í Þistilfirði, orti í lok tuttugustu aldar, er hann var orðinn langeygur eftir vori:¶ Norðangarrinn nakta jörð¶ nótt sem daga lemur.¶ Þá er vor um Þistilfjörð¶ þegar hrafninn kemur.¶ Öfugmælavísan:¶ Silungurinn sótti lyng,¶ svalan hrísið brenndi,¶ flugan úr gulli gerði hring,¶ geitin járnið renndi.¶ Halldór Blöndal (halldorblondal@simnet.is)¶ Halldór Blöndal