Ingólfur Ómar sendi mér góðan póst: Nú er hann napur og verður næstu daga. Þó erum við hér á suðvesturhorninu laus við snjóinn miðað við aðra landshluta.
Foldin stynur föl á brá
frostið læsir klónum.
Emja freðin ýlustrá
úti í köldum mónum.
Magnús Halldórsson skrifaði á Boðnarmjöð á þriðjudag kl. 16.22: Tíðindi úr húsi við Reykjavíkurtjörn:
Dauft er ljósið dvínar skar,
Dagurinn vék úr stólnum.
Maddama framsókn mætt er þar
í margræðum græna kjólnum.
Friðrik Steingrímsson í tilefni af því að Trump vann stórsigur í Iowa. visir.is:
Efsta sæti Trumps er traust,
það talsvert marga hrelldi.
Ástþór gæti efalaust
ógnað karlsins veldi.
Ný barnagæla eftir Pál
Jónasson í Hlíð:
Heitir Snati hestur minn
hann er rati mesti,
ensku pratar auminginn
oft við matargesti.
Og hér er limran Dans eftir Pál:
Krummi bauð gamalli kráku í dans,
hún kyssti á svarta nefið hans,
„og út á gólfið þau liðu létt
í Lúðvíks fjórtánda menúett“
en enduðu á stökkræl og Óla skans.
Hugleiðing Jóns Kristjánssonar um lífið og tilveruna gerð undir umræðum á Alþingi um gagnagrunn á heilbrigðissviði:
Fyrrum ég ungmey unni
og allar lífsnautnir kunni.
Svo lýkur vegferð
að lokum eg verð
að kóða í gagnagrunni.
Eyjólfur Óskar Eyjólfsson um geðillskufausk:
Hjá þeim gamla var geðillskan slík
að menn gleyma því aldrei í Vík
en nú er sá sauður
fyrir sjö árum dauður
og með eindæmum leiðinlegt lík.
Símon Dalaskáld um Grím á þingi:
Grímur klingir gæða-þur
góma bjöllu sinni,
er á þingi óþægur,
Álftnesingum hvimleiður.
Á Tannstaðabakka til varð frétt¶ sem töluvert mér á óvart kemur¶ en öruggt er víst og alveg rétt¶ að Ingibjörg bar þar kálfum þremur.¶ Dottinn í dúnalogn. Indriði á Fjalli kvað:¶ Fann ég á þönum fólskan byl,¶ flestum illt til lagði,¶ en er lognið tók sig til¶ tyllti 'ann sér og þagði.¶ Símon Dalaskáld um stúlku sem drakk:¶ Síst marglampa sæmir Lín,¶ sem oft skrambans veldur pín,¶ ofan í vambar iður sín¶ áfengt þamba brennivín.¶Öfugmælavísan:
Nálykt best til heilsu eg held,
hér með sveigju í glerum,
fundið hef ég oft frosinn eld
og fiskiveiði í hverum.